അർബുദ രോഗികൾക്ക് മുടി ധാനം ചെയ്യുന്നത് എങ്ങനെ എന്ന് നോക്കാം
മുഖസൗന്ദര്യമെന്ന് ആകെത്തുകയായി പറയുമ്പോൾ മുടിയുടെ സൗന്ദര്യം കൂടി അതിൽ ഉൾപ്പെടുന്നുണ്ട്. ചീകിയും, ചീകാതെയും, വകച്ചിലിട്ടും, പൊക്കികെട്ടിയും, ഇഴപിന്നിയും ഒക്കെ നമ്മൾ കാത്തുസൂക്ഷിക്കുന്ന അത്യാവശ്യം നീളമുള്ള മുടി വെട്ടിയെടുക്കുക എന്നത് പലർക്കും ചിന്തിക്കാൻ പോലും ദുഷ്കരമാണ്. എന്നാൽ അത് മറ്റൊരാൾക്ക് ഉപകാരത്തിന് വേണ്ടി ത്യജിക്കുന്നതാണെങ്കിലോ?
കേശദാനം എന്താണ്?
മാരകരോഗമായ ക്യാൻസർ ബാധിച്ചവർക്ക് റേഡിയേഷൻ ചികിത്സയുടെ ഭാഗമായും മറ്റും മുടികൾ തീരെ കൊഴിഞ്ഞില്ലാതാവാറുണ്ട്. അവർക്ക് വേണ്ടി നമ്മുടെ നിശ്ചിത നീളമുള്ള മുടിയിഴകൾ വെട്ടി സംഭാവന ചെയ്യുന്നതാണ് കേശദാനം. നമ്മൾ സംഭാവന ചെയ്യുന്ന മുടിക്കെട്ട് സ്വീകരിക്കാനും, അവയെ വിഗ്ഗുകളാക്കി മാറ്റി മുൻപറഞ്ഞ ആവശ്യക്കാർക്ക് കൊടുക്കുവാനും കഴിയുന്ന നിരവധി സന്നദ്ധസംഘടനകളും അവരുടെ പ്രോഗ്രാമുകളും ഉണ്ട്.
കേശദാനത്തിന്റെ ആവശ്യകത
കീമോതെറാപ്പിയുടെയും മരുന്നുകളുടെ പാർശ്വഫലമായും മറ്റും സാരമായ മുടികൊഴിച്ചിലുണ്ടാവുന്ന കാൻസർ രോഗികൾ വൈകാരികമായ പലവിധ വെല്ലുവിളികളുമായി മല്ലിടുന്നുണ്ട്. അവർക്ക് ആശ്വാസവും, ആത്മവിശ്വാസവും, ശക്തിയും, പ്രതീക്ഷയും നൽകാൻ നമുക്ക് സാധിക്കും. നമ്മൾ കൊടുക്കുന്ന മുടിയിഴകൾ കൊണ്ടു നിർമ്മിക്കുന്ന വിഗ്ഗുകൾ വലിയൊരളവ് വരെ അവർക്കുള്ള നമ്മുടെ സാന്ത്വനമാണ്. ത്യാഗത്തിലൂടെയല്ലാതെ മഹത്തായതൊന്നും ഒരിക്കലും, ആരും നേടിയിട്ടില്ല.
മുടി ദാനം ചെയ്യേണ്ടവർ അറിയേണ്ട അത്യാവശ്യ കാര്യങ്ങൾ
എല്ലാവർക്കും ദാനം ചെയ്യാൻ കഴിയാവുന്ന മുടിയുടെ ഏറ്റവും കുറഞ്ഞ നീളം പല സംഘടനകളുടെയും ലക്ഷ്യത്തെ ആശ്രയിച്ചിരിക്കുന്നു. ഉദാഹഹരണത്തിന് കുട്ടികൾക്കും സ്ത്രീകൾക്കും വ്യത്യസ്ത നീളം ആയിരിക്കുമല്ലോ വേണ്ടത്. സാധാരണയായി 7.5 ഇഞ്ച് മുതൽ 14 ഇഞ്ച് വരെമുതിർന്നവർക്കും കുട്ടികൾക്കും മുടി ദാനം ചെയ്യാം.
കളർ ചെയ്തതോ, കൃത്രിമമായി ചുരുളുകൾ ആക്കിയതോ, ഹൈലൈറ്റ് ചെയ്തതോ, ബ്ലീച്ച് ചെയ്തതോ, അഴിയാത്ത വിധം ജട വീണതോ, നരച്ചതോ ആയ മുടി ഒരു സ്ഥാപനം എടുക്കുമോ ഇല്ലയോ എന്ന് നിങ്ങൾ വിശകലനം ചെയ്യേണ്ടി വന്നേക്കാം. ഉദാഹരണത്തിന് ചില സംഘടനകൾ നരച്ച മുടി അല്ലെങ്കിൽ മുടിയിൽ ഒരു നിശ്ചിത ശതമാനം വരെ ചാരനിറം സ്വീകരിക്കുന്നു, മറ്റു ചിലർ അത് സ്വീകരിക്കുന്നില്ല. അതുപോലെ സ്വന്തം കാൻസർ ചികിത്സയ്ക്കിടെ ഉപയോഗിച്ചിരുന്ന ഒരു വിഗ് സംഭാവന നൽകാൻ ആഗ്രഹിക്കുന്നുവെങ്കിൽ, അത് നവീകരിച്ച് എടുക്കുന്ന മറ്റ് സംഘടനകളുണ്ട്.
നിങ്ങൾ സലൂണിലേക്ക് പോകുന്നതിന് മുമ്പ്, ഇത് ഉറപ്പാക്കുക:
മുടി കഴുകി ഉണക്കുക. നിങ്ങളുടെ മുടി കഴുകിയ ശേഷം, ഹെയർസ്‌പ്രേ, ജെൽ തുടങ്ങിയ മുടി ഉൽപ്പന്നങ്ങളൊന്നും ഉപയോഗിക്കരുത്. ദാനം ചെയ്യപ്പെടുന്ന മുടി കയറ്റുമതി ചെയ്യുന്നതിനുമുമ്പ് പൂർണ്ണമായും ഉണങ്ങിയതായിരിക്കണം, അല്ലെങ്കിൽ അത് പൂപ്പൽ ഉണ്ടാക്കുകയും ഉപയോഗശൂന്യമാവുകയും ചെയ്യും.
ഒരു നീളമുള്ള സ്കെയിൽ, പോണിടെയിൽ ഹോൾഡറുകൾ, ഒരു റീസീലബിൾ പ്ലാസ്റ്റിക് ബാഗ് എന്നിവ കയ്യിൽ കരുതുക. നല്ല ഒരു ഹെയർസ്റ്റൈലിസ്റ്റിനെ സമീപിക്കുക.
ചില കേശദാന സംഘടനകൾ മുടി മുറിക്കുന്നതിന് അവരുടെ പരിചയത്തിലുള്ള പ്രത്യേക സലൂണുകളോ, ഹെയർ സ്റ്റൈലിസ്റ്റുകളെയോ തരപ്പെടുത്തി തന്നേക്കാം. അല്ലാത്തപക്ഷം നിങ്ങളുടെ ഹെയർസ്റ്റൈലിസ്റ്റ് കേശദാനത്തിന് വേണ്ടി മുടി മുറിയ്ക്കുന്നതിനുള്ള നിർദ്ദിഷ്ട നിർദ്ദേശങ്ങൾ പാലിക്കുന്നുണ്ടെന്ന് ഉറപ്പാക്കുക. കേശദാനത്തിന് വേണ്ടി മുടി മുറിയ്ക്കുന്നതിനുള്ള നിർദ്ദിഷ്ട നിർദ്ദേശങ്ങൾകേശദാനത്തിന് വേണ്ടി മുടി മുറിക്കുന്നത് എല്ലാ സ്റ്റൈലിസ്റ്റുകൾക്കും അറിയണമെന്നില്ല.
ഒരു ഹെയർസ്റ്റൈലിസ്റ്റിന് കേശാദാനത്തിനായി പ്രത്യേക പരിശീലനം ആവശ്യമില്ല, എന്നിരുന്നാലും നിങ്ങളുടെ ഹെയർസ്റ്റൈലിസ്റ്റ് മുമ്പ് ഈ ആവശ്യത്തിന് വേണ്ടി ഹെയർകട്ട് ചെയ്‌തിട്ടില്ലെങ്കിൽ ഹെയർകട്ടിന്റെ കാരണവും നിങ്ങൾ തിരഞ്ഞെടുത്ത സ്ഥാപനം നിർദ്ദേശിച്ചിട്ടുള്ള മാർഗ്ഗനിർദ്ദേശങ്ങൾ നിങ്ങളുടെ മുടിവെട്ടുന്ന ആളോട് മുൻകൂട്ടി പറഞ്ഞ് മനസിലാക്കിയെന്ന് ഉറപ്പ് വരുത്തുക.
നിങ്ങളുടെ മുടി മുറിയ്ക്കുന്നതിന് അവർ ലളിതവും എന്നാൽ നിർദ്ദിഷ്ടവുമായ കുറച്ച് നിർദ്ദേശങ്ങൾ പാലിക്കേണ്ടതുണ്ട്. നിങ്ങൾ തിരഞ്ഞെടുത്ത സംഘടനയുടെ ആവശ്യകതകൾ മനസ്സിലാക്കി അതനുസരിച്ചു മുടി വെട്ടുക എന്നത് പ്രധാനമാണ്.
ഇത് കൂടാതെ മുടി മുറിച്ചുമാറ്റി സലൂണിൽ നിന്ന് പുറത്തുപോകുമ്പോൾ നിങ്ങൾക്ക് ഏതുതരം ഹെയർസ്‌റ്റൈൽ വേണമെന്നും സംസാരിച്ച് ഉറപ്പിച്ചിരിക്കണം. അങ്ങനെയെങ്കിൽ മുടി ദാനം ചെയ്ത് കഴിഞ്ഞു പീന്നീടുള്ള നിങ്ങളുടെ മുഖഛായയിൽ ഖേദിക്കുന്നത് ഒഴിവാക്കാം.
എന്താണ് മുടി മുറിയ്ക്കുമ്പോഴുള്ള പൊതുവായ മാർഗ്ഗനിർദ്ദേശങ്ങൾ?
നിങ്ങളുടെ മുടി വെട്ടേണ്ടത് എത്ര നീളത്തിലായിരിക്കണമെന്ന് നിങ്ങളും സ്റ്റൈലിസ്റ്റും ചർച്ച ചെയ്ത് ഉറപ്പിച്ചു കഴിഞ്ഞാൽ, മുടിക്ക് ആവശ്യമുള്ള നീളമുണ്ടെന്ന് ഉറപ്പാക്കാൻ ഒരു സ്കെയിൽ ഉപയോഗിച്ച് അളക്കുക. ചുരുണ്ട മുടിയാണെങ്കിൽ കൃത്യമായ അളവെടുപ്പിനായി നേരെ വലിക്കണം.
സംഘടന നിർദ്ദേശിയ്ക്കുന്ന അളവ് ഉറപ്പു വരുത്തുക. 8 ഇഞ്ച് മുതൽ 14 ഇഞ്ച് വരെയാണ് ചിലർ നീളം പറയാറുള്ളത്. പലപ്പോഴും മുടി ഒരു വലിയ ഒറ്റക്കെട്ടായുള്ള പോണിടെയിലായി മുറിയ്ക്കുന്നതിനേക്കാൾ പല ചെറിയ പോണിടെയിൽ ഭാഗങ്ങളായി മുറിക്കുന്നതാണ് കൂടുതൽ ഉപയോഗയോഗ്യമാവുന്നത്. പൊതുവേ മുറിച്ച മുടി ഒരു പോണിടെയിലിലേക്കോ, ബ്രെയ്‌ഡിലേക്കോ രണ്ടറ്റത്തും റബ്ബർ ബാൻഡോ, പോണിടെയിൽ ഹോൾഡറുകളോ ഉപയോഗിച്ച് ഉറപ്പിച്ചിരിക്കണമെന്ന് ആവശ്യപ്പെടുന്നു. അയഞ്ഞ മുടിയോ കഷ്ണങ്ങളോ സ്വീകാര്യമായിരിക്കില്ല.
മുറിച്ച മുടിയുടെ പായ്ക്കിങ്ങ് എങ്ങനെയാണ് ചെയ്യേണ്ടത്?
സംഘടനയുടെ പ്രതിനിധികൾ കൂടെയുണ്ടെങ്കിൽ പായ്ക്ക് ചെയ്ത് കൊണ്ടുപോവാൻ അവർ മുൻകൈയെടുക്കും. അവരില്ലാത്തപക്ഷം മുറിച്ച മുടി സുരക്ഷിതമായി അവശ്യ വലിപ്പമുള്ള ഒരു റീസീലബിൾ പ്ലാസ്റ്റിക് കവറിൽ കെട്ടുപിണയുകയോ കൂടിക്കുഴയുകയോ ചെയ്യാത്ത തരത്തിൽ വച്ച് ക്ലോത്ത് എൻവലപ്പിലോ മറ്റോ പായ്ക്ക് ചെയ്ത് ആവശ്യത്തിന് തപാൽ തുക വച്ച് സംഘടനയുടെ വിലാസത്തിലേക്ക് അയക്കുകയോ അല്ലെങ്കിൽ നേരിൽ കൈമാറുകയോ ചെയ്യുക.
നിങ്ങളുടെ മുടി എവിടെയാണ് അയയ്ക്കേണ്ടതെന്ന് തിരഞ്ഞെടുക്കുക
ഓരോ കേശദാന സ്ഥാപനത്തിനും അതിൻ്റെതായ ദൗത്യവും ലക്ഷ്യവുമുണ്ട്. ആർക്കൊക്കെ വിഗ്ഗുകൾ ലഭിക്കുന്നു, എങ്ങനെ എന്നിവയെക്കുറിച്ച് അറിയുവാൻ നിങ്ങൾ ഒരു ശ്രമം നടത്തുക. ഉദാഹരണത്തിന്, ചില സംഘടനകൾ ക്യാൻസറോ മറ്റ് മെഡിക്കൽ കാരണമോ മൂലം മുടി കൊഴിഞ്ഞ കുട്ടികളെ കേന്ദ്രീകരിക്കുന്നു, ചില സ്ഥാപനങ്ങൾ പ്രത്യേക സ്ഥലം കേന്ദ്രീകരിച്ചും, പ്രത്യേക ആശുപത്രികൾ, കാൻസർ സെന്ററുകൾ കേന്ദ്രീകരിച്ചും സേവനം നൽകുന്നു.
ശരിയായ സന്നദ്ധപ്രവർത്തകരെയോ, ജീവകാരുണ്യ സംഘടനയെയോ കണ്ടെത്തുക
ക്യാന്‍സര്‍രോഗിൾ‍ക്കായുള്ള ചില സംഘടനകളുടെ കേശദാനം ഒരുതരം കബളിപ്പിക്കലാണെന്ന ചില വാർ‍ത്തകള്‍ ശ്രദ്ധയില്ൽപ്പെടുന്നുണ്ട്. ജീവകാരുണ്യ പ്രവർത്തനത്തിൻ്റെ മറവിൽ തട്ടിപ്പുകൾ നടത്തി ലക്ഷകണക്കിന് രൂപ കൊള്ളയടിക്കുന്ന സംഘടനകൾ നമുക്ക് ചുറ്റും ഉണ്ട്.
ചിലപ്പോഴൊക്കെ ഈ മാഫിയാ സംഘടനകൾ മികച്ച രീതിയിൽ പ്രവർത്തനം നടത്തുന്ന സന്നദ്ധ സംഘടനകളെ കൂടി കരുവാക്കുകയും ചെയ്യാറുണ്ട്. ഇത്തരത്തിൽ മുടി മുറിച്ച് പുരുഷന്മാര്‍ക്കുളള വിഗ് നിർ‍മിച്ച് വൻ‍വിലക്ക് വിൽപ്പന നടത്തുന്ന സംഘങ്ങളും രംഗത്തുണ്ടെന്നും ആരോപണം ഉയർന്ന് വരുന്നുണ്ട്
ക്യാന്‍സര്‍ രോഗികളോട് അനുഭാവം പ്രകടിപ്പിച്ച് മുടിദാനത്തിന് വിദ്യാർ‍ഥികളും വീട്ടമ്മമാരും ഉൾപ്പെടെ രംഗത്തുവരുന്നത് മുതലെടുത്താണ് തട്ടിപ്പുസംഘങ്ങൾ വിലസുന്നത്. ആഗോളതലത്തിൽ പ്രവര്‍ത്തിക്കുന്ന ഇത്തരം 'സന്നദ്ധ' സംഘങ്ങൾ‍ക്കൊന്നിനും സ്വന്തമായി വെബ്സൈറ്റ് പോലും ഇല്ല.
പഴയ പത്രവാര്‍ത്തകളുടെ ലിങ്ക് അല്ലെങ്കില്‍ ഫെയ്സ്ബുക്ക് പേജിൻ്റെ ലിങ്ക് എന്നിവയൊക്കെയാണ് ലഭിക്കുക. ഇവയിൽ ആളുകളിൽ നിന്ന് പ്രത്യേകിച്ച് പെൺകുട്ടികളിൽ നിന്നും മുടി മുറിച്ചെടുക്കുന്ന ചിത്രമല്ലാതെ ഏതെങ്കിലും ക്യാന്‍സര്‍ രോഗിക്ക് വിഗ് നല്ൽകുന്ന ചിത്രമോ വാർ‍ത്തയൊ കാണാനാകില്ല.
കീമോ തെറാപ്പി ചെയ്യുമ്പോൾ മുടി നഷ്ടമാകുമെന്ന് അറിയാത്ത രോഗികൾ കുറവാണ്. നേരത്തെ തന്നെ മുടിവെട്ടി സൂക്ഷിച്ചാൽ അവർക്കുതന്നെ വിഗ് തയ്യാറാക്കാം. അപൂർവ്വം ചിലരൊക്കെ അങ്ങനെയും ചെയ്യുന്നുണ്ട്. വിഗിന് 10,000 രൂപ മുതൽ ലക്ഷങ്ങൾ വരെയാണ് വിപണിവില. 20 ഇഞ്ച് നീളമുള്ള ഒരാളുടെ മുടി മുറിച്ച് നല്ൽകുമ്പോള്‍ പതിനായിരം രൂപ നിലവിൽ ലഭിക്കുന്നുണ്ട്.
സൌന്ദര്യവർധക വസ്തുക്കൾ മുതൽ സംസ്കരിച്ച ഭക്ഷ്യ പദാർ‍ഥങ്ങളില്‍ വരെ അസംസ്കൃതവസ്തുവായ മുടിയുടെ ഉപയോഗം വർ‍ധിച്ചുവരികയാണെന്ന് കേൾക്കുന്നു. ഈ സാഹചര്യത്തില്ൽ കൂടിയാണ് കാരുണ്യ പ്രവര്‍ത്തനത്തിൻ്റെ മറവില്ൽ മുടി മുറിക്കലും അതുപയോഗിച്ചുള്ള ധനസമ്പാദനവും സംഘടിത തട്ടിപ്പായി വളർ‍ന്നിട്ടുള്ളത്. അതുകൊണ്ട് ശരിയായ സന്നദ്ധസംഘടനയെ കണ്ടെത്തുക എന്നത് അത്യന്താപേക്ഷിതമാണ്.
കേശദാനം സമൂഹത്തിന് കാരുണ്യത്തിൻ്റെയും സ്നേഹത്തിൻ്റെയും വലിയൊരു മാതൃകയാണ്. കേശദാനം മുൻനിർത്തി സത്യസന്ധമായി പ്രവർത്തിക്കുന്ന നിരവധി സന്നദ്ധസംഘടനകൾ നമുക്ക് ചുറ്റും ഉണ്ട്. അതിനാൽ കള്ളനാണയങ്ങളെ ഒഴിവാക്കി ശരിയായവയെ കണ്ടെത്തുക എന്നത് വളരെ പ്രാധാന്യം അർഹിക്കുന്നു.
കേരളത്തിലെ ഹെയർ ഡോനെഷൻ കേന്ദ്രങ്ങൾ
ഔദ്യോഗികമായി, യഥാർത്ഥ കേശദാനം നടത്തുന്ന ചില സ്ഥാപനങ്ങളുടെ വിലാസം ചുവടെ ചേർത്തിരിക്കുന്നു:
1. Sargakshetra Cultural And Charitble Centre
Fr Praikalam, CMI Ashram, Chethipuzha P.O, Changanassery, Kottayam, Kerala-686104, https://www.sargakshetra.org/, sargakshetra@gmail.com, 0481-2726481, +91 94964 64118
2. Protect you Mom. Asia
Fr. Jaison Mundanmany (CMI), Associate Director, Amala Medical College Hospital, Amala Nagar P.O, Thrissur, Kerala-680555, https://protectyourmom.asia/hair-donation, acdmkt113@gmail.com, 0487230401, 04872304000
3. Hair Bank by Miracle Charitable Association
Chelakkottukara, Thrissur 680005, https://hairbank.in, 9847098237
4. Hair Crown
Shri Renuga Vidhyalayam Educational Trust, Theni Main Road, Lakshmipuram, Theni 625605, Tamil Nadu, https://www.haircrown.in, haircrownoffice@gmail.com, +919486121062, 8778121425
5. Cope With Cancer
Madat Trust, Mangal Anand Hospital, 2nd Floor, 48, Swastik Park, Sion-Trombay Road, Chembur, Mumbai 400071, https://www.copewithcancer.org/hair-donation, support@copewithcancer.org, 022-49701285, 9987779639
കേശാദാന ഇവെന്റുകൾ പറ്റി പ്രചരിപ്പിക്കുന്നതും ബോധവത്കരണം നടത്തി ആളുകളിൽ താൽപ്പര്യം ജനിപ്പിക്കുന്നതും വളരെ നല്ലതാണ്. നിങ്ങളുടെ മുടി നന്നായി പരിപാലിക്കുന്നത് തുടരുക, അതുവഴി നിങ്ങൾക്ക് ഭാവിയിലും കേശദാനം ചെയ്യാൻ കഴിയും. നമ്മുടെ പ്രവൃത്തി മറ്റൊരാളുടെ പുഞ്ചിരിക്ക് കാരണമാകുമെങ്കിൽ അതാണ് പുണ്യം.
continue reading.
സോഷ്യൽ മീഡിയ ഭ്രമത്തിൽ നിന്ന് വളരെ എളുപ്പത്തിൽ അകന്നു നിൽക്കാനുള്ള 7 നുറുങ്ങുകൾ
ദൈനംദിന ജീവിതത്തിൽ നാമിന്ന് ഏറ്റവും കൂടുതൽ സമയം ചിലവഴിക്കുന്നത് സമൂഹ മാധ്യമങ്ങളിലാണ്. ഓരോ വ്യക്തിയുടെയും ജീവിതത്തിൽ ഒഴിവാക്കാനാകാത്ത ഒരു വസ്തുതയായി മാറിയിരിക്കുന്നു സമൂഹ മാധ്യമങ്ങൾ. ജീവിതത്തിന്റെ പലവിധ ആവശ്യങ്ങൾക്ക് സോഷ്യൽ മീഡിയ ധാരാളം ഗുണങ്ങൾ നമുക്ക് നൽകുന്നു എന്നതിലുപരി പല രീതിയിലും അത് ദോഷകരമാകാറുണ്ട്. സോഷ്യമീഡിയയുടെ സാധ്യതകളും ഗുണങ്ങളും ഉപയോഗപ്പടുത്തുന്നതോടൊപ്പം അതൊരു ഭ്രമമായി, അടിമത്തമായി മാറാതിരിക്കാൻ നാം ശ്രദ്ധിക്കേണ്ടതുണ്ട്. സോഷ്യൽ മീഡിയ ഭ്രമം എങ്ങനെയൊക്കെ നമ്മുടെ ജീവിതത്തിനും കരിയറിനും ദോഷകരമാകുന്നു എന്നും ആ ഭ്രമത്തെ വളരെ എളുപ്പത്തിൽ അകറ്റി നമ്മുടെ ജീവിതത്തെ എങ്ങനെ ക്രമീകരിക്കാം എന്നതിനെ കുറിച്ചും വായിക്കാം. ## സോഷ്യൽ മീഡിയ എങ്ങനെ നമ്മുടെ ജീവിതത്തെ ബാധിക്കുന്നു?  സോഷ്യൽ മീഡിയയെ നമ്മൾ എല്ലാവരും ഇഷ്ടപ്പെടുന്നവരാണ്. എത്ര കഠിനമായി ശ്രമിച്ചാലും, ഇടയ്ക്കിടെ സോഷ്യൽ മീഡിയ ഫീഡുകളിലൂടെ സ്ക്രോൾ ചെയ്യാനുള്ള നമ്മുടെ പ്രലോഭനത്തെ അതിജയിക്കാൻ നമുക്ക് സാധിക്കാറില്ല. സോഷ്യൽ മീഡിയ ഭ്രമത്തിലൂടെ ഏറ്റവും പുതിയ ട്രെൻഡുകളെ അപ്ഡേറ്റഡായി ഫോളോ ചെയ്യാനും, എല്ലാ ചെറിയ കാര്യങ്ങളും സമൂഹ മാധ്യമങ്ങളിൽ പോസ്റ്റുചെയ്യാനുമുള്ള അധിക സമ്മർദ്ദത്തിന് വഴങ്ങി വിലപ്പെട്ട സമയവും ഊർജ്ജവും നഷ്ടപ്പെടുത്തവരാണ് നാം. നമ്മുടെ പോസ്റ്റുകളിൽ ലഭിക്കുന്ന കമൻ്റുകൾക്ക് മറുപടി നൽകുകയും, നമ്മുടേതിൽ കൂടുതൽ ഇൻ്ററാക്ഷന് വേണ്ടി മറ്റ് പോസ്റ്റുകളുമായി ഇൻ്ററാക്ഷൻ നടത്തുകയും കൂടുതൽ കാര്യങ്ങൾ ചെയ്യുകയും വേണം. സോഷ്യൽ മീഡിയയിൽ ലൈക്ക് ചെയ്യാനും പോസ്റ്റ് ചെയ്യാനും കമൻ്റിടാനും നമ്മൾ ദിവസത്തിൻ്റ പകുതിയിൽ അധികം ചെലവഴിക്കുന്നുവെന്ന് തന്നെ മനസിലാക്കാം. വ്യക്തിജീവിതത്തിൽ ഏറ്റവും പ്രധാനപ്പെട്ട കാര്യങ്ങൾ ചെയ്യാനോ മറ്റു പ്രോജക്റ്റുകൾ ചെയ്തു തീർക്കാനോ മുതിരുമ്പോൾ നമ്മുടെ പോസ്റ്റുകൾക്ക് എത്ര ലൈക്കുകൾ ലഭിച്ചിട്ടുണ്ടാകുമെന്നോ മറ്റോ ആയിരിക്കും നാം ചിന്തിച്ചുകൊണ്ടിരിക്കുന്നത്. പിന്നെ അത് പരിശോധിക്കാനുള്ള സമ്മർദ്ധത്തിന് മുന്നിൽ നാം തോറ്റ് പോകുന്നു. സോഷ്യൽ മീഡിയ കൂടുതൽ നേരം ഉപയോഗിക്കുന്നത് അവസാനിപ്പിക്കാൻ എല്ലാവരും ആഗ്രഹിച്ചേക്കാം. പക്ഷേ എങ്ങനെ? ഇതാണ് എല്ലാവർക്കും പ്രശ്നം. എന്നാൽ ഇനി അതിനൊന്നും ഒരു വഴിയും തിരയേണ്ട. ചില ടിപ്സുകൾ ഇതാ. ### 1. ലക്ഷ്യം നിശ്ചയിക്കുക സോഷ്യൽ മീഡിയ ഉപയോഗം പരിമിതപ്പെടുത്തുന്നതിലൂടെ നിങ്ങൾ എന്താണ് ചെയ്യാൻ ആഗ്രഹിക്കുന്നത്? ഈ ചോദ്യത്തിനുള്ള നിങ്ങളുടെ ഉത്തരം നിങ്ങളുടെ പ്രവർത്തന പദ്ധതിയനുസരിച്ചാണ്. നാം ഓരോ ദിവസവും അന്നന്ന് നേടിയെടുക്കേണ്ട ഒരു ലക്ഷ്യം മുൻകൂട്ടി തീരുമാനിക്കുന്നതിലൂടെ നമ്മുടെ ഓരോ ദിവസവും ക്രിയാത്മകവും പ്രൊഡക്റ്റീവുമാക്കാവുന്നതാണ്. ഒരു ദിവസത്തിനായി നിങ്ങൾ ഒരു ലക്ഷ്യം തീരുമാനിച്ചുകഴിഞ്ഞാൽ, നിങ്ങൾക്ക് അത് കാണാൻ കഴിയുന്നിടത്ത് എഴുതുക. ഓഫീസിൽ സോഷ്യൽ മീഡിയ പരിശോധിക്കുന്നത് പ്രശ്നമാണെങ്കിൽ നിങ്ങളുടെ വർക്ക് കമ്പ്യൂട്ടറിൽ ഒരു സ്റ്റിക്കി നോട്ട് ഇടുക. കിടക്കുന്നതിനു മുമ്പുള്ള ഉപയോഗമാണ് പ്രശ്നമെങ്കിൽ, നിങ്ങളുടെ കസേരയുടെ അടുത്തായി ഒരു കുറിപ്പ് വയ്ക്കുക. നിങ്ങൾക്ക് പ്രശ്‌നങ്ങളുള്ളിടത്തെല്ലാം ഒരു ഓർമ്മപ്പെടുത്തലായി കുറിപ്പ് തയാറാക്കി വെക്കുക. അതിലൂടെ നിങ്ങൾക്ക് ആ ദിവസത്തെ നിങ്ങളുടെ ലക്ഷ്യം നേടാനും നിങ്ങളുടെ സമയം ക്രിയാത്മകമായി ഉപയോഗപ്പെടുത്താനും കഴിയും. മാത്രമല്ല ഇതിലൂടെ നിങ്ങളെ തന്നെ നിയന്ത്രിക്കാനും സോഷ്യൽ മീഡിയ ഉപയോഗം കുറക്കുവാനും സാധിക്കുന്നതാണ്. ### 2. ഒരു ഹോബി തിരഞ്ഞെടുക്കുക നിങ്ങളുടെ സമയം ഉപകാരപ്പെടുത്താൻ മൂല്യവത്തായ എന്തെങ്കിലും ചെയ്യാൻ നിങ്ങൾക്ക് കഴിയുമെങ്കിൽ സോഷ്യൽ മീഡിയയിലേക്ക് പലപ്പോഴും തിരിയേണ്ട ആവശ്യം നിങ്ങൾക്ക് അനുഭവപ്പെടില്ല. ഒരു ഹോബിയിൽ ഏർപ്പെടുന്നത് നമ്മൾ ചെയ്യുന്ന കാര്യങ്ങളിൽ നമ്മുടെ മനസ്സിനെ പരിശീലിപ്പിക്കുകയും പാകപ്പെടുത്തുകയും ചെയ്യുന്നു. ഹോബികൾ ഒരു പുസ്തകം വായിക്കുന്നത് പോലെ ലളിതമോ മരപ്പണി പോലെ സങ്കീർണ്ണമോ ആകാം. നിങ്ങൾ ചെയ്യാൻ ആഗ്രഹിക്കുന്നതെന്തും ഒരു ഹോബിയായി സ്വീകരിക്കാം. സോഷ്യൽ മീഡിയയ്ക്ക് പകരം ചിലവഴിക്കാൻ കഴിയുന്ന ഉൽപ്പാദനപരമായ പ്രവർത്തനങ്ങളിൽ നിങ്ങളുടെ സമയം ഉപയോഗപ്പെടുത്ത‍ുക. ### 3. ഇമെയിൽ സന്ദേശങ്ങൾക്ക് അമിത ശ്രദ്ധകൊടുക്കാതിരിക്കുക നിങ്ങളുടെ കമ്പ്യൂട്ടറിലും സ്മാർട്ട് ഫോണുകളിലും ഇമെയിൽ നോട്ടിഫിക്കേഷനുകൾ പരിമിതപ്പെടുത്തുന്നതാണ് നല്ലത്. എന്തെങ്കിലും അടിയന്തിരമായി സംഭവിക്കുകയാണെങ്കിൽ, ആളുകൾ സന്ദേശമയയ്‌ക്കുകയോ വിളിക്കുകയോ ചെയ്യുന്നതിനാൽ ഓരോ തവണയും പുതിയ ഇമെയിൽ വരുമ്പോൾ നിങ്ങളുടെ ഇൻബോക്‌സ് പരിശോധിക്കേണ്ട ആവശ്യമില്ല. അതുകൊണ്ടാണ് ഇമെയിൽ നോട്ടിഫിക്കേഷൻ ഓഫ് ചെയ്യണമെന്ന് പ്രോത്സാഹിപ്പിക്കുന്നത്. `_BANNER_` ### 4. ഒരു വെബ് ബ്ലോക്കർ ഉപയോഗിക്കുക ഇൻ്റർനെറ്റിൻ്റെ ലഭ്യത ചില ദിവസങ്ങളിൽ വളരെ പ്രലോഭിപ്പിച്ചേക്കാം. ഒരേ ബ്രൗസറിൽ നിന്ന് സോഷ്യൽ മീഡിയയിലേക്ക് മാറുന്നത് വളരെ എളുപ്പമാണല്ലോ. അതിനാൽ തന്നെ നാം എന്തെങ്കിലും സെർച്ച് ചെയ്യുകയാണെങ്കിൽ അത് മറ്റു പല ടാബുകളിലേക്കും വിഷയങ്ങളിലേക്കും മാറിപ്പോകുന്നതിലൂടെ നമ്മുടെ സമയവും ഏകാഗ്രതയും നഷ്ടപ്പെടുന്നു. ചിലപ്പോൾ ശ്രദ്ധയില്ലായ്മയിൽ നിന്ന് കരകയറാൻ വളരെ സമയം എടുത്തേക്കാം. ഇതിനെ മറികടക്കാൻ വെബ് ബ്ലോക്കറുകൾ നമ്മെ സഹായിക്കുന്നു. ഒരു സെെറ്റിൽ നിന്ന് മറ്റു സൈറ്റുകളിലേക്ക് പോകുന്നതിൽ നിന്ന് വെബ് ബ്ലോക്കറുകൾ നമ്മെ തടയുന്നു. ജോലി സമയങ്ങളിൽ നിങ്ങൾക്ക് ഈ ഫീച്ചർ ഇനാബ്ൾ ചെയ്യാം, അങ്ങനെ നിങ്ങളുടെ മനസ്സ് അലയാൻ തുടങ്ങുമ്പോൾ സോഷ്യൽ മീഡിയയിലേക്ക് തിരിയാൻ കഴിയില്ല. നിങ്ങൾക്ക് ആവശ്യമാകുമ്പോഴെല്ലാം ഈ പ്രതിരോധ സഹായം ഫലപ്രദമാക്കാവുന്നതാണ്. ### 5. നോ-ടെക് സോണുകൾ സ്ഥാപിക്കുക നിങ്ങളുടെ വീട്ടിലോ വർക്ക്‌സ്‌പെയ്‌സിലോ നോ-ടെക് സോണുകൾ നിങ്ങൾക്ക് സ്ഥാപിക്കാവുന്നതാണ്. നിങ്ങൾ ശ്രദ്ധ കേന്ദ്രീകരിക്കേണ്ട സ്ഥലങ്ങളിൽ നിന്ന് നിങ്ങളുടെ ഉപകരണങ്ങളെ അകറ്റി നിർത്തുകയാണെങ്കിൽ, സോഷ്യൽ മീഡിയയിൽ നിന്ന് ശ്രദ്ധ തിരിക്കുന്നതിനുള്ള സാധ്യത കുറയും എന്നതാണ് ഇതിൻ്റെ പ്രത്യേകത. കിടപ്പുമുറി, കുളിമുറി, തീൻമേശ, ഹോം ഓഫീസ് എന്നിവയെല്ലാം ഒരു ഉപകരണം വളരെയധികം ശ്രദ്ധ തിരിക്കുന്ന സ്ഥലങ്ങളുടെ ഉദാഹരണങ്ങളാണ്. മറ്റ് മുറികളിൽ നിങ്ങളുടെ ഉപകരണങ്ങൾ മാത്രം ഉപയോഗിക്കുന്നതിന് പരിമിതപ്പെടുത്തുകയും ചെയ്യാം. ### 6. ടൈംബോക്സിംഗ് പരീക്ഷിക്കുക നിങ്ങളുടെ ആപ്പുകൾ മാനേജുചെയ്യുന്നതിനും ശ്രദ്ധ വ്യതിചലിക്കാതിരിക്കുന്നതിനുമുള്ള മാർഗമാണ് ടൈംബോക്സിംഗ്. പ്രത്യേക പ്രവർത്തനങ്ങൾക്കായി നിങ്ങളുടെ ദൈനംദിന, പ്രതിവാര ഷെഡ്യൂളിൽ നിർദ്ദിഷ്ട സമയ സ്ലോട്ടുകൾ നിശ്ചയിക്കുന്ന പ്രക്രിയയാണ് ടൈംബോക്സിംഗ്. ടൈംബോക്സിംഗ് എന്നത് ഒരു ടൈം മാനേജ്‌മെൻ്റ് ടെക്നിക്കാണ്, അതിൽ നിങ്ങൾ ഏകീകൃത പ്രവർത്തനങ്ങൾക്കായി സമയത്തിൻ്റെ ഓരോ ഭാഗങ്ങൾ വ്യത്യസ്ത ആവശ്യങ്ങൾക്കായി നീക്കിവെക്കുന്നു. ഉദാഹരണത്തിന്, ഇമെയിലുകൾക്ക് മറുപടി നൽകാൻ നിങ്ങൾക്ക് ജോലിയുടെ ആദ്യ മണിക്കൂർ മാറ്റിവെക്കാം. ആ സമയം കഴിഞ്ഞാലുടൻ നിങ്ങളുടെ ഇമെയിൽ ക്ലോസ് ചെയ്ത് അടുത്ത ബ്ലോക്കിലേക്ക് പോകുക. നിശ്ചിത സമയങ്ങളിൽ നിശ്ചിത ആവശ്യങ്ങളിൽ മാത്രം ഫോക്കസ് ചെയ്യുന്നതിലൂടെ ഓരോ ആവശ്യങ്ങളും അതത് സമയങ്ങളിൽ തന്നെ പൂർത്തീകരിക്കാൻ സഹായകമാണ്. ഈ രീതി ഉപയോഗിക്കുന്നതിലൂടെ, നിങ്ങൾക്ക് സോഷ്യൽ മീഡിയ ഉപയോഗിക്കാനാകാത്തതും ഉപയോഗിക്കാവുന്നതുമായ സമയ വിഭാഗങ്ങൾ സെറ്റ് ചെയ്യാനാകും. നിങ്ങളുടെ ടെെ ബോക്സുകൾ കൃത്യമായി ഉപയോഗപ്പെടുത്തുന്നതിലൂടെ സോഷ്യൽ മീഡിയ ആവശ്യത്തിന് മാത്രം ഉപയോഗിക്കാൻ നിങ്ങൾക്ക് നിങ്ങളെ തന്നെ സ്വയം പരിശീലിപ്പിക്കാൻ സാധിക്കുന്നതാണ്. ടൈംബോക്സിംഗ് ഒരു ടെക്നിക് ആയാണ് പ്രവർത്തിക്കുന്നത്. അതുകൊണ്ടുതന്നെ ഉൽപ്പാദനക്ഷമതാ രീതി കൂടിയാണിത്. കാരണം നമ്മുടെ പ്രവർത്തനങ്ങൾക്ക് ഒരു നിശ്ചിത സമയപരിധി നൽകുമ്പോൾ ടാസ്‌ക്കുകൾ വേഗത്തിൽ പൂർത്തിയാക്കാൻ നാം ശ്രമിക്കുന്നു. ### 7. സോഷ്യൽ മീഡിയ ഫാസ്റ്റ് ചിലപ്പോൾ നമ്മുടെ ജീവിതത്തിനൊരു അടുക്കും ചിട്ടയും വരാൻ ഗുരുതരമായ പ്രശ്നങ്ങൾക്ക് ഗുരുതരമായ നടപടികൾ ആവശ്യമായേക്കാം. സോഷ്യൽ മീഡിയ ഭ്രമം തടയാൻ നിങ്ങളുടെ ബ്രെയിൻ റീസെറ്റ് ചെയ്യേണ്ടതുണ്ടെങ്കിൽ ഒരാഴ്ച മുഴുവൻ സോഷ്യൽ മീഡിയ ഡിറ്റോക്സ് പരീക്ഷിക്കാവുന്നതാണ്. നമ്മിൽ പലർക്കും ഇത് ബുദ്ധിമുട്ടായിരിക്കും, പക്ഷേ പൂർണ്ണമായും ക്രിയാത്മകവും ഉൽപ്പാദനക്ഷമവുമായ ജീവിതം നയിക്കാൻ സോഷ്യൽ മീഡിയ ആവശ്യമില്ലെന്ന് മനസ്സിലാക്കാൻ ഇത് നമ്മെ സഹായിക്കും, തീർച്ച. ## സോഷ്യൽ മീഡിയ ഉപയോഗവും കൗമാരവും  ജനങ്ങളിൽ ഭൂരിഭാഗം പേരും ഇന്ന് സോഷ്യൽ മീഡിയ ഉപഭോക്താക്കളാണെങ്കിലും കണക്കുകളും പഠനങ്ങളും സൂചിപ്പിക്കുന്നത് കൗമാരപ്രായക്കാരാണ് ഏറ്റവും കൂടുതൽ സോഷ്യൽ മീഡിയ ഉപയോഗിക്കുന്നതെന്നാണ്. ഇത് അവരുടെ സാമൂഹ്യ ജീവിതത്തെയും പഠനത്തെയും ഗുരുതരമായി ബാധിക്കുന്നതിനാൽ രക്ഷിതാക്കൾ ഏറെ ശ്രദ്ധപുലർത്തേണ്ട കാര്യമാണിത്. ## സോഷ്യൽ മീഡിയയും വിഷാദരോഗവും  യു‌എസിൽ നിന്നുള്ള പുതിയ ഗവേഷണങ്ങൾ പറയുന്നത് സോഷ്യൽ നെറ്റ്‌വർക്കുകളിൽ കൂടുതൽ സമയം ചെലവഴിക്കുന്തോറും വിഷാദരോഗം ഉണ്ടാകാനുള്ള സാധ്യത കൂടുതലാണെന്നാണ്. സോഷ്യൽ മീഡിയ അമിതമായി ഉപയോഗിക്കുന്ന പ്രായം കുറഞ്ഞ ഉപയോക്താക്കൾക്കിടയിൽ വിഷാദരോഗത്തിനുള്ള സാധ്യത കൂടുതലാണെന്ന് മുമ്പും റിപ്പോർട്ട് വന്നിരുന്നു. അമേരിക്കൻ ജേണൽ ഓഫ് പ്രിവന്റീവ് മെഡിസിനാണ് പഠനം പ്രസിദ്ധീകരിച്ചിരിക്കുന്നത്. 18 നും 30 നും ഇടയിൽ പ്രായമുള്ള ആയിരത്തിലധികം യുവാക്കളെ സാമ്പിൾ ചെയ്താണ് പഠനം പൂർത്തിയാക്കിയത്. വിഷാദരോഗം മനസിലാക്കുന്ന തരത്തിലുള്ള ഒരു പ്രത്യേക സർപവ്വേയിലൂടെയാണ് ഇവർ കണക്കുകൾ തയ്യാറാക്കിയത്. നിരവധി പഠനങ്ങളിൽ, Instagram, Facebook, മറ്റ് പ്ലാറ്റ്‌ഫോമുകൾ എന്നിവയിൽ ഏറ്റവും കൂടുതൽ സമയം ചെലവഴിക്കുന്ന കൗമാരക്കാർക്കും യുവാക്കൾക്കും കുറഞ്ഞ സമയം ചെലവഴിച്ചവരെ അപേക്ഷിച്ച് വിഷാദരോഗത്തിന്റെ നിരക്ക് ഗണ്യമായി (13 മുതൽ 66 ശതമാനം വരെ) റിപ്പോർട്ട് ചെയ്യപ്പെട്ടിട്ടുണ്ട്. സോഷ്യൽ മീഡിയ പ്രതിദിനം അഞ്ച് മണിക്കൂറിൽ കൂടുതൽ ചെലവഴിച്ച ചെറുപ്പക്കാർ ആറു മാസത്തിനുള്ളിൽ തന്നെ വിഷാദ രോഗത്തിൽ പിടിപെടാൻ 2.8 മടങ്ങ് സാധ്യതയുണ്ടെന്ന് ശാസ്ത്രജ്ഞർ കണ്ടെത്തിയിട്ടുണ്ട്. സോഷ്യൽ നെറ്റ്‌വർക്കുകൾ പ്രതിദിനം രണ്ട് മണിക്കൂറിൽ താഴെ ഉപയോഗിക്കുന്നവർക്ക് താരതമ്യേന സാധ്യത കുറവാണ്. ## സോഷ്യൽ മീഡിയ ഭ്രമത്തിൻ്റെ ദോഷങ്ങൾ എന്തൊക്കെ?  ### 1. വൈകാരിക ബന്ധം ഇല്ലാതാകുന്നു സോഷ്യൽ മീഡിയയിൽ വളരെയധികം സമയം ചെലവഴിക്കുന്നത് കാരണം വ്യക്തിപരമായ ബന്ധങ്ങൾക്ക് ലഭിക്കുന്ന സമയം കുറയുമെന്ന് ഗവേഷകർ അഭിപ്രായപ്പെടുന്നു. സോഷ്യൽ മീഡിയയിലൂടെയുള്ള സംഭാഷണങ്ങളും ബന്ധങ്ങളും മറ്റൊരാളുടെ യഥാർത്ഥ വികാരമോ വിചാരമോ അനുഭവിക്കാൻ കഴിയില്ല. പരസ്പര സംഭാഷണങ്ങളിൽ വ്യക്തികൾ പറയുന്നതാണോ യഥാർത്ഥത്തിൽ അവർ ഉദ്ദേശിക്കുന്നതെന്ന് മനസ്സിലാക്കാനും നമുക്ക് കഴിയില്ല. മാത്രമല്ല സോഷ്യൽ മീഡിയയുടെ യാന്ത്രികതയിൽ ജീവനുള്ള ബന്ധങ്ങൾ ഇല്ലാതാകുകയും ചെയ്യുന്നു. ### 2. ഫേസ് റ്റു ഫേസ് കമ്മ്യൂണിക്കേഷൻ സ്കില്ലുകൾ കുറയ്ക്കുന്നു കമ്പ്യൂട്ടറുകളെയും സ്മാർട്ട് ഫോണുകളെയും ആശ്രയിക്കുന്നത് ഒരു വ്യക്തിയുടെ മുഖാമുഖ സംഭാഷണം നടത്താനുള്ള കഴിവിനെ ദോഷകരമായി ബാധിക്കുന്നു. എന്തെങ്കിലും കേൾക്കുന്നത് അരോചകവും അസാധാരണവുമാക്കുകയും പരസ്പരം കേൾക്കാനും മനസ്സിലാക്കാനുമുള്ള മാനുഷിക പരിഗണനാ ബോധം കെെവരിക്കാതിരിക്കുകയും ചെയ്യുന്നു. ഒരു സന്ദേശം കൈമാറാൻ കീബോർഡിനെ ആശ്രയിക്കുന്നതിനാൽ സംസാരശെെലീ ഗുണങ്ങൾ നഷ്ടപ്പെടുന്നു. ### 3. സാമൂഹ്യവൽക്കരണം വിദൂര സൗഹൃദങ്ങൾ കെട്ടിപ്പടുക്കാൻ സോഷ്യൽ മീഡിയ സഹായിക്കുന്നു എന്നത് ശരിയാണെങ്കിലും, അത് അവരുടെ അടുത്ത ആളുകളുടെ ബന്ധത്തെ പ്രതികൂലമായി ബാധിക്കും. സോഷ്യൽ മീഡിയ അമിതമായി ഉപയോഗിക്കുന്ന വിദ്യാർത്ഥികൾക്ക് അവരുടെ പ്രിയപ്പെട്ടവരുമായുള്ള ബന്ധം നഷ്ടപ്പെടാം. അവർ സോഷ്യൽ മീഡിയയിൽ വളരെയധികം അഡിക്റ്റായേക്കാം, അങ്ങനെ അവർ സുഹൃത്തുക്കളുമായും കുടുംബാംഗങ്ങളുമായും സമയം ചെലവഴിക്കാൻ മറന്നുപോയേക്കാം. ### 4. അനുചിതമായ കണ്ടൻ്റുകൾ സോഷ്യൽ മീഡിയയിൽ ലഭ്യമായ എല്ലാം വിദ്യാർത്ഥികൾക്ക് അനുയോജ്യമാകണമെന്നില്ല. വിദ്യാർത്ഥികൾ, പ്രത്യേകിച്ച് പ്രായപൂർത്തിയാകാത്ത കുട്ടികൾ മനഃപൂർവമോ അല്ലാതെയോ അനുചിതമായ ഉള്ളടക്കത്തിന് വിധേയരാകുന്നു. ഇതിൽ പോണോഗ്രാഫിയും ഉൾപ്പെടുന്നു. ഒരു ഗെയിം കളിക്കുമ്പോഴോ ന്യൂസ് ഫീഡ് സ്ക്രോൾ ചെയ്യുമ്പോഴോ പെട്ടെന്ന് ഇത് കാണുകയും അത് അവരെ മാനസികമായി ബാധിക്കുകയും ചെയ്യുന്നു. ആത്യന്തികമായി, വിദ്യാർത്ഥികൾ മാനസികമായി തകർന്നേക്കാം. കുട്ടികൾ സോഷ്യൽ മീഡിയ ഉപയോഗിക്കുന്നത് എങ്ങനെയെന്ന് നിരീക്ഷിക്കേണ്ടത് മാതാപിതാക്കളുടെ ഉത്തരവാദിത്തമാണ്. ### 5. ആരോഗ്യ ആശങ്കകൾ വിദ്യാർത്ഥികളുൾപ്പെടെ മിക്ക സോഷ്യൽ മീഡിയ ഉപയോക്താക്കൾക്കും സോഷ്യൽ മീഡിയയുടെ അമിതമായ ഉപയോഗം മൂലം പലപ്പോഴും പല ആരോഗ്യപ്രശ്നങ്ങളും നേരിടേണ്ടിവരുന്നു. സമൂഹമാധ്യമങ്ങൾക്ക് അടിമപ്പെട്ട വിദ്യാർഥികൾ രാവും പകലും കംപ്യൂട്ടറിന് മുന്നിലോ സ്മാർട്ട് ഫോൺ കൈയിലോ ഇരുന്ന് ചെലവഴിക്കുന്നു. ശാരീരികമായ ചലനങ്ങളൊന്നും ഇതിൽ ഉൾപ്പെടാത്തതിനാൽ ഇതിന്റെ ഫലം പൊണ്ണത്തടിയാകാം. സോഷ്യൽ മീഡിയ ഉപയോഗിക്കുന്നതിന്റെ പേരിൽ പല വിദ്യാർത്ഥികളും ഉറക്കം ഒഴിവാക്കുന്നു. ഇത് മറ്റ് അപകടകരമായ പ്രത്യാഘാതങ്ങളിലേക്ക് നയിച്ചേക്കാവുന്ന നിരവധി ഉറക്ക തകരാറുകൾ കൊണ്ടുവരും. ### 6. സൈബർ ബുള്ളിയിങ് സോഷ്യൽ മീഡിയ ആളുകളെ അജ്ഞാതരാക്കാൻ അനുവദിക്കുന്നതിനാൽ ഇത് സൈബർ ബുള്ളിയിങ്ങിനുള്ള ഒരു പ്ലാറ്റ്‌ഫോമായി ഉപയോഗിക്കാം. അക്രമികൾ സോഷ്യൽ മീഡിയയിൽ വ്യാജ അക്കൗണ്ടുകൾ സൃഷ്ടിക്കുന്നതുവഴി മറ്റുള്ളവരെ കളിയാക്കാനും ഉപദ്രവിക്കാനും കഴിയും. ഇതുമൂലം വിദ്യാർത്ഥികൾക്ക് ഉത്കണ്ഠ, വിഷാദം, സമ്മർദ്ദം, മറ്റ് മാനസിക പ്രശ്നങ്ങൾ എന്നിവ നേരിടേണ്ടിവരും. ചുരുക്കത്തിൽ സാങ്കേതികവിദ്യയുടെ വളർച്ച മൂലം സോഷ്യൽ മീഡിയ വലിയ സാധ്യതകൾ ഒരുക്കി വെക്കുന്നുണ്ട് എങ്കിലും കണ്ടറിഞ്ഞ് സൂക്ഷ്മതയോടെ ഉപയോഗിച്ചില്ലെങ്കിൽ കൊണ്ടറിയുമെന്ന് മനസ്സിലാക്കുക തന്നെ വേണം.
ആഗ്രഹിക്കുന്നതെന്തും നേടാൻ എന്ത് ചെയ്യണം?
ഓരോ മനുഷ്യനും ഉത്തരം തേടിയിട്ടുള്ള ചോദ്യമാണ് നിങ്ങൾ മുകളിൽ കാണുന്നത്. ആഗ്രഹിക്കുന്നതെന്തും നേടാൻ എന്ത് ചെയ്യണം? ഭൂരിഭാഗം പേരും ഉത്തരം തേടുന്നതിൽ നിന്നും അകന്നു പോയി, ഉത്തരം കിട്ടിയ പലരും അത് ജീവിതത്തിൽ പ്രാവർത്തികമാക്കിയില്ല, ഉത്തരം ജീവിതത്തിൽ സമന്വയിപ്പിച്ചു അത് അക്ഷീണം പിന്തുടർന്ന അപൂർവ്വം ചിലർ വിജയസോപാനത്തിൽ എത്തി. ## ആഗ്രഹത്തെ അവയുടെ പൂർത്തീകരണത്തിൽ നിന്നും അഥവാ ആത്മസാക്ഷാത്ക്കാരത്തിൽ നിന്നും പിൻവലിക്കുന്നത് എന്തൊക്കെയാണ്?  ആഗ്രഹങ്ങൾ ഇല്ലാത്തവർ വളരെ അപൂർവ്വമാണ്. ആഗ്രഹങ്ങൾ എല്ലാം സാധിച്ചവരും അപൂർവ്വമാണ്. ആഗ്രഹപൂർത്തീകരണത്തിൽ നിന്നും നമ്മളെ വിലക്കുന്ന ക്രിയാത്മകമല്ലാത്ത സംഗതികൾ എന്താണെന്ന് ആദ്യം മനസിലാക്കാം. ക്രിയാത്മകമല്ലാത്ത അനേകം കാര്യങ്ങളിൽ ചിലതാണ് ആഗ്രഹത്തിലെ തീവ്രതയില്ലായ്മ, തെറ്റായ ചിന്താഗതി, അശുഭാപ്തിവിശ്വാസം, മടി, അദ്ധ്വാനക്കുറവ്, ലക്ഷ്യത്തിൽ നിന്നുള്ള പിന്മാറ്റം, ആസൂത്രണം ഇല്ലായ്മ അല്ലെങ്കിൽ ആസൂത്രണത്തിലെ പിഴവ് തുടങ്ങിയവ.. ലക്ഷ്യത്തിൽ നിന്നും അകറ്റുന്ന ഇതുപോലുള്ള ശീലങ്ങൾ ഒഴിവാക്കുകയും ഇതിന് വിപരീതമായ ശുഭാപ്തി വിശ്വാസത്തോടെ ക്രിയാത്മക ശൈലികൾ പിന്തുടരുകയും ചെയ്താൽ വിജയം സുനിശ്ചിതം. നിങ്ങളുടെ എല്ലാ ലക്ഷ്യങ്ങളും കീഴടക്കാൻ കഴിയണം എങ്കിൽ നിങ്ങളുടെ ജീവിതത്തിൽ വരുത്തേണ്ട ഏറ്റവും വലിയ മാറ്റം നിങ്ങളുടെ സ്വന്തം ചിന്താഗതിയാണ്. വിശ്വസിച്ചാലും ഇല്ലെങ്കിലും, ഇത് പൂർണ്ണമായും സാധ്യമാണ്. ചിന്തകൾ വളരെയധികം പ്രാധാന്യം അർഹിക്കുന്നു . കാരണം നല്ല ചിന്തകളാണ് വിശ്വാസത്തിലേക്കും സത്പ്രവർത്തിയിലേക്കും നയിക്കുന്നത്. അത്തരം സ്ഥിരമായ പ്രവർത്തി നല്ല ശീലങ്ങളിലേക്കും, അത് മികച്ച സ്വഭാവരൂപീകരണത്തിലേക്കും, തുടർന്ന് വിജയത്തിലേക്കും നയിക്കുന്നു. കഴിഞ്ഞ കുറച്ച് നാളുകളായി "ആവിഷ്ക്കാരം" (Manifestation), "ആകർഷണ നിയമം" (Law of attraction) തുടങ്ങിയ പദങ്ങളെക്കുറിച്ച് നിങ്ങൾ കേട്ടിരിക്കാം. ജനമനസ്സുകളിൽ മാനിഫെസ്റ്റേഷൻ, ലോ ഓഫ് അട്രാക്ഷൻ പ്രചുരപ്രചാരം നേടിയത് എക്കാലത്തെയും പ്രശസ്തമായ സ്വയം സഹായ പുസ്തകങ്ങളിൽ ഒന്നിലൂടെയാണ് - റോണ്ടാ ബൈൺ രചിച്ച "രഹസ്യം" (The Secret). ദ സീക്രട്ട് പോലുള്ള പുസ്തകങ്ങളിൽ പഠിപ്പിക്കുന്ന മാനസിക വിദ്യകൾ ഈയിടെ കൂടുതൽ ജനപ്രീതി നേടിയിട്ടുണ്ട്. ഈ വിദ്യകൾ ശരിക്കും പ്രവർത്തിക്കും എന്ന് ഒരുപാട് ആളുകൾക്ക് തോന്നിയതിൻ്റെ ഫലമാണ് ഈ ജനപ്രീതി. ഈ മാനിഫെസ്റ്റേഷൻ വിദ്യകളെക്കുറിച്ച് നിങ്ങൾ മുമ്പ് കേട്ടിട്ടുണ്ടാകാം, എന്നാൽ അവ എന്താണ് അർത്ഥമാക്കുന്നത്, അതിലും പ്രധാനമായി, നിങ്ങളുടെ സ്വന്തം ജീവിതത്തിൽ അവ എങ്ങനെ നടപ്പിലാക്കണം എന്ന് നിങ്ങൾക്ക് അറിയാമോ? നിങ്ങളുടെ ലക്ഷ്യങ്ങൾ സാക്ഷാത്കരിക്കാൻ സഹായിക്കുന്ന മികച്ച ആവിഷ്‌ക്കാര വിദ്യകളെ കുറിച്ച് കൂടുതലറിയാം. ## എല്ലാറ്റിനും മുൻപ് എന്താണ് മാനിഫെസ്റ്റേഷൻ എന്നറിയാം  ലളിതമായി പറഞ്ഞാൽ, സാധിക്കും എന്ന് ഉറച്ചു വിശ്വസിക്കുന്നതിലൂടെ നിങ്ങൾ സംഭവിക്കാൻ ആഗ്രഹിക്കുന്ന എന്തെങ്കിലും സാധിപ്പിക്കുന്നതാണ് മാനിഫെസ്റ്റേഷൻ (ആവിഷ്ക്കാരം അഥവാ സാക്ഷാത്കാരം). ചിലർക്ക് ഇപ്പോഴിത് സങ്കീർണ്ണമായി തോന്നിയേക്കാം. സങ്കീർണ്ണതകളും സംശയങ്ങളും ഒട്ടുമില്ലാതെ മനസ്സിൽ ഉടലെടുക്കുന്ന വിശ്വാസമാണ് ഇതിൻ്റെ മൂലാധാരം. മാനിഫെസ്റ്റേഷൻ്റെ ഏറ്റവും അടിസ്ഥാനപരമായ കാരണം, പോസിറ്റീവ് മാനസികാവസ്ഥ സ്വീകരിക്കുന്നതാണ്. ആവിഷ്ക്കാരത്തിന് പരിമിതികൾ ഉണ്ടെങ്കിലും, നിങ്ങളുടെ ചിന്താഗതി മാറ്റുന്നതിനുള്ള ശക്തിയെ കുറച്ചുകാണാതിരിക്കേണ്ടത് പ്രധാനമാണ്. അവിടെയാണ് മാജിക് സംഭവിക്കുന്നത്. ## എന്താണ് ആകർഷണ നിയമം?  ആകർഷണ നിയമം കേവലം ഒരു ചിന്താമാർഗ്ഗമല്ല, അത് ഒരു ജീവിതരീതിയാണ്. “സന്തോഷവും ആരോഗ്യവും സമ്പത്തും കണ്ടെത്താൻ നിങ്ങൾ ആഗ്രഹിക്കുന്നുണ്ടോ?” എന്ന് നിങ്ങളോട് ചോദിച്ചാൽ നമ്മിൽ മിക്കവരും ഈ ചോദ്യത്തിന് അതിശയകരമായി ഒരേ ഉത്തരം നൽകുമെന്നതിൽ സംശയമില്ല! വലിയ പ്രശ്‌നങ്ങളില്ലാതെ സുഖപ്രദമായ ജീവിതം നയിക്കാൻ ആഗ്രഹിക്കാത്ത ആരാണുള്ളത്? അതിനായി ആകർഷണ നിയമം നിങ്ങളെ എങ്ങനെ സഹായിക്കും? അറിഞ്ഞും അറിയാതെയും നാമെല്ലാവരും ആകർഷണ നിയമത്തെ ഏതെങ്കിലും തരത്തിൽ ജീവിതത്തിൽ ഉപയോഗിക്കുന്നു, ലളിതമായി പറഞ്ഞാല്‍ സമാനമായ ഊര്‍ജം പരസ്പരം ആകര്‍ഷിക്കപ്പെടുന്നു എന്ന സാര്‍വത്രികമായ നിയമമാണ് ആകര്‍ഷണ നിയമം. മറ്റൊരു തരത്തില്‍ പറഞ്ഞാല്‍ നിങ്ങള്‍ ശ്രദ്ധകേന്ദ്രീകരിക്കുന്നത് എന്തിലാണോ അതിനെ നിങ്ങൾക്ക് തിരികെ ലഭിക്കുന്നു. നമ്മുടെ ഇന്ദ്രിയങ്ങള്‍ക്ക് മനസ്സിലാക്കാന്‍ ബുദ്ധിമുട്ടാണെങ്കിലും നമ്മള്‍ ഊര്‍ജത്തിന്റെയും അതുണ്ടാക്കുന്ന പ്രകമ്പന(Vibration) ത്തിന്റെയും ലോകത്താണ് ജീവിക്കുന്നതെന്ന് ക്വാണ്ടം ഫിസിക്സ് തെളിയിച്ചിട്ടുണ്ട്. നെഗറ്റീവ് ചിന്തകൾ നിങ്ങൾ കരുതുന്നുവെങ്കിൽ, നിങ്ങളുടെ ജീവിതത്തിലേക്ക് നെഗറ്റീവ് സംഭവങ്ങൾ വന്നുകൂടുന്നു. പോസിറ്റീവ് ചിന്തകളാണ് നിങ്ങളെ സ്വാധീനിക്കുന്നതെങ്കിൽ, നിങ്ങളുടെ ജീവിതത്തിലേക്ക് നല്ല സംഭവങ്ങൾ മാത്രമേ ആകർഷിക്കുകയുള്ളൂ. നമ്മൾ ആകർഷണ നിയമം ഉപയോഗിക്കുകയാണെങ്കിൽ ആഗ്രഹിക്കുന്ന ബന്ധങ്ങൾ, ആരോഗ്യം, ആഗ്രഹിക്കുന്ന തൊഴിൽ, സ്വപ്നഭവനം, സന്തോഷം, സംതൃപ്തി, സമാധാനം അങ്ങനെ നമ്മൾ ആഗ്രഹിക്കുന്നതെന്തും സ്വന്തമാകും. സ്ഥല സമയ കാലാതീതമയി സദാ പ്രപഞ്ചത്തിൽ പ്രവർത്തിച്ചു കൊണ്ടിരിക്കുന്ന പ്രാപഞ്ചിക നിയമമാണ് ആകർഷണ നിയമം. ഗ്രാവിറ്റേഷൻ നിയമത്തെ കുറിച്ച് നമുക്ക് അറിയാമല്ലോ. ഭൂമി അതിൻറെ കേന്ദ്രത്തിലേക്ക് എല്ലാ വസ്തുക്കളേയും സദാ ആകർ ഷിച്ചു കൊണ്ടിരിക്കുകയാണല്ലോ. രാജ്യമോ, സ്ഥലമോ, സമയമോ, വലിപ്പ ചെറുപ്പമോ, ധനികനെന്നോ, ദരിദ്രനെന്നോ, പാമരനെന്നോ പണ്ഡിതനെന്നോ വ്യത്യാസമില്ല. മുകളിൽ നിന്ന് ആരു ചാടിയലും ഭൂമിയിൽ പതിക്കുമെന്നതിന് ഒരു സംശയവുമില്ല. അതാണ് ഗ്രാവി റ്റി നിയമം. അതുപോലെ തന്നെ വ്യക്തികളും, കാലങ്ങളും, രാജ്യ ങ്ങളും, സമയവും യാതൊന്നും തന്നെ പ്രാപഞ്ചിക ആകർഷണ നിയമത്തെ ബാധിക്കുകയില്ല. നമ്മുടെ ജീവിത്തിൽ നമ്മൾ ആഗ്രഹിക്കുന്നതുപോലുള്ള മനോഹ രമായ ഒരു ജീവിതം പടുത്തുയർത്തുവാൻ നമുക്ക് ഉപയോഗി ക്കുവാൻ കഴിയുന്ന ഒരു ടെക്നിക്കാണ് ആകർഷണ നിയമം. നാം അറിഞ്ഞാലും അറിഞ്ഞില്ലെങ്കിലും നമ്മുടെ നിത്യ ജീവിതത്തിൽ നിത്യവും സംഭവിച്ചു കൊണ്ടിരിക്കുന്നു എന്നാണ് പരമാർത്ഥം. നാം എന്താണ് ഉപോബോധമനസ്സിൽ ചിന്തിക്കുന്നത് അതു തന്നെ ജീവിത്തിൽ സംഭവിക്കും എന്നാണ് ഈ നിയമം. നിങ്ങൾ തുടർ ച്ചയായി ഒരു പരാജിതനാണെന്ന് ചിന്തിച്ചുകൊണ്ടിരുന്നാൽ ജീവി തത്തിൽ അതു സംഭവിച്ചു കൊണ്ടിരിക്കും. ഞാൻ ഒരു വിജയിയാ ണ് എന്ന് ചിന്തിച്ചു കൊണ്ടിരുന്നാൽ വിജയിച്ചുകൊ ണ്ടിരിക്കുന്നു. എന്തും ചിന്തിച്ചിരുന്നു വിശ്വസിച്ചാൽ അതും സംഭവിക്കും. നമ്മുടെ ആന്തരിക ലോ കത്തിൽ എന്താണോ ചിന്തിച്ചിരിക്കുന്നത് അതു തന്നെ പുറം ലോകത്ത് സംഭവിച്ചിരിക്കും. നിങ്ങളുടെ മനസ്സിൽ എന്താണോ വിശ്വസിച്ചിരിക്കുന്നത് അതു തന്നെയാണ് സംഭവിക്കുന്നത്. ഇല്ലായ്മയാണെങ്കിൽ ദരിദ്രനും, ഉള്ളായ്മയാണെങ്കിൽ ധനാവാനും ആയി തീരൂന്നു. ചിന്ത മാത്രം പോര, വിശ്വാസവും കൂടി വേണം. മാനിഫെസ്റ്റേഷൻ എന്ന പദത്തിനൊപ്പം കൂട്ടി വായിക്കേണ്ടത് ആകർഷണ നിയമത്തിന്റെ ആശയമാണ്. ആകർഷണ നിയമം അടിസ്ഥാനപരമായി പ്രസ്താവിക്കുന്നത് നമ്മൾ ശ്രദ്ധ കേന്ദ്രീകരിക്കുന്നതിനെ ജീവിതത്തിൽ ആകർഷിക്കും എന്നാണ്. ജീവിതത്തിലെ നിഷേധാത്മകതയിൽ ശ്രദ്ധ കേന്ദ്രീകരിക്കുകയാണെങ്കിൽ, നമ്മുടെ സാഹചര്യം കൂടുതൽ പ്രതികൂലമായി വളരും. എന്നാൽ ജീവിതത്തിൻ്റെ പോസിറ്റീവ് വശങ്ങളിൽ ശ്രദ്ധ കേന്ദ്രീകരിക്കുകയും നമ്മുടെ ഭാവി ലക്ഷ്യങ്ങൾ മനസ്സിൽ ഉറപ്പിക്കുകയും ചെയ്താൽ, അവ നേടാനുള്ള ഒരു വഴി നാം കണ്ടെത്തും. നിങ്ങൾ ഒരു പോസിറ്റീവ് മാനസികാവസ്ഥയിൽ ഉണർന്നിരുന്നുവെങ്കിൽ, നിങ്ങളുടെ നേരെ വരുന്നതെന്തും കീഴടക്കാൻ തയ്യാറാണെങ്കിൽ, ദിവസം മുഴുവനും നിങ്ങളുടെ വ്യക്തിത്വവും പ്രവർത്തനങ്ങളും എങ്ങനെ മികച്ചതായിരിക്കുമെന്ന് ചിന്തിച്ചു നോക്കൂ. നമുക്ക് എല്ലായ്പ്പോഴും നമ്മുടെ വികാരങ്ങളെ നിയന്ത്രിക്കാൻ കഴിയില്ല (അത് ജീവിതത്തിൻ്റെ സ്വാഭാവിക അവസ്ഥയാണ്), നമ്മുടെ മാനസികാവസ്ഥ തീർച്ചയായും നമ്മുടെ പ്രവർത്തനങ്ങളെ സ്വാധീനിക്കുകയും നമ്മുടെ ലക്ഷ്യങ്ങൾ നിറവേറ്റുന്നതിൽ വലിയ പങ്ക് വഹിക്കുകയും ചെയ്യും. തങ്ങളുടെ സ്വപ്നങ്ങൾ സ്വയം സാക്ഷാത്കരിക്കാനുള്ള കഴിവുണ്ടെന്ന് വിശ്വസിക്കാത്ത ഒരാൾക്ക് ശ്രമിക്കാനുള്ള ധൈര്യം പോലും കാണില്ല. മനസ്സ് വെച്ചാൽ ആർക്കും ഇത് ചെയ്യാം. ഇത് ആഗ്രഹതീവ്രത, അടിയുറച്ച വിശ്വാസം, കഠിനാധ്വാനം, സ്ഥിരോത്സാഹം, അർപ്പണബോധം എന്നിവയെക്കുറിച്ചാണ്. ആരംഭിക്കുന്നതിനുള്ള ആദ്യപടി ആരംഭിക്കുക എന്നതാണ്. ജീവിതത്തിലെ മിക്കവാറും എന്തിനെക്കുറിച്ചും അതാണ് സത്യം; എന്തെങ്കിലും നേടുന്നതിനുള്ള ആദ്യപടി അത് യഥാർത്ഥത്തിൽ സാധ്യമാണെന്ന് വിശ്വസിക്കുക എന്നതാണ്. ## മാനിഫെസ്റ്റേഷൻ ടെക്നിക്കുകൾ ഉപയോഗിക്കുന്നതിന് മുൻപ് അറിയേണ്ട ചില കാര്യങ്ങൾ  ഒരു ലക്ഷ്യം സജ്ജമാക്കുന്നത് സ്വയം ദിശാബോധം നൽകുന്നു. നിങ്ങളുടെ ദൈനംദിന ചിന്തകളും പ്രവൃത്തികളും ഉപയോഗിച്ച് നിങ്ങൾ നിങ്ങളുടെ സ്വന്തം വിധി നിയന്ത്രിക്കുകയാണ്. നിങ്ങളുടെ ജീവിതത്തിൽ നിങ്ങൾ മാറ്റാൻ ആഗ്രഹിക്കുന്ന കാര്യങ്ങളെക്കുറിച്ചോ അല്ലെങ്കിൽ നിങ്ങൾ നേടാൻ ആഗ്രഹിക്കുന്ന ചില ലക്ഷ്യങ്ങളെക്കുറിച്ചോ ചിന്തിക്കുക. നിങ്ങളുടെ ലക്ഷ്യം ഭൗതിക വസ്തുക്കളാവാം ആവാതിരിക്കാം. ഒരു ലക്ഷ്യം കണ്ടെത്തി മനസ്സിൽ സ്ഥാപിക്കുമ്പോൾ നിങ്ങൾ അവയുടെ മൂല്യങ്ങളെക്കുറിച്ചും, ജീവിതത്തിൽ നിങ്ങൾക്ക് അത് എത്ര പ്രധാനമായതാണ് എന്നും ചിന്തിക്കുക. എന്തുകൊണ്ടാണ് നിങ്ങൾ അത് നേടാൻ ആഗ്രഹിക്കുന്നത്? അത് നിങ്ങൾക്കായി എന്ത് ചെയ്യും? ഇത് നിങ്ങളെത്തന്നെ അറിയാൻ സഹായിക്കുക മാത്രമല്ല, നിങ്ങളുടെ ആഗ്രഹങ്ങളുടെ ആത്മാവിലേക്ക് നിങ്ങളെ നയിക്കുകയും ചെയ്യുന്നു. നിങ്ങളുടെ ജീവിതത്തിന് കാര്യമായ രീതിയിൽ സംഭാവന നൽകുന്ന അർത്ഥവത്തായതും പോസിറ്റീവുമായ കാര്യങ്ങൾ നിങ്ങൾ ആവിഷ്ക്കരിക്കുന്നു എന്നത് ഉറപ്പാക്കുക. ## മാനിഫെസ്റ്റേഷൻ ടെക്നിക്കുകൾ ഉപയോഗിച്ച് ആഗ്രഹങ്ങൾ എങ്ങനെ സാധ്യമാക്കാം — 5 മികച്ച ആവിഷ്‌ക്കാര വിദ്യകൾ മനസിലാക്കാം നിങ്ങളുടെ ലക്ഷ്യങ്ങൾ കീഴടക്കാൻ സഹായിക്കുന്ന ഈ 5 മാനിഫെസ്റ്റേഷൻ വിദ്യകൾ പരീക്ഷിക്കുക. ### 1. പേപ്പർ ബർണിങ് ടെക്നിക്  വളരെ നന്നായി മനസ്സിനെ ശുദ്ധികരിക്കാൻ സഹായിക്കുന്ന മികച്ച ഒരു ടെക്‌നിക്ക് ആണിത്. വളരെ എളുപ്പത്തിൽ ഒരു 10 -30 mins കൊണ്ട് ചെയ്യാം. ആദ്യം ഒരു വെള്ള പേപ്പർ എടുക്കുക (A4 sheet അല്ലെങ്കിൽ ബുക്ക് പേപ്പർ). എന്നിട്ടു ആ പേപ്പറിൽ നിങ്ങളുടെ എല്ലാ പ്രശ്നങ്ങളും എഴുതുക. ദൈവത്തിനോട് മനസ്സ് തുറന്നു പറയുന്നതുപോലെ , അല്ലെങ്കിൽ നിങ്ങളുടെ ഒരു സുഹൃത്തിനോട് പറയുന്നത് പോലെ എഴുതാം. ഇതുവരെ ജീവിതത്തിൽ ഉണ്ടായ എല്ലാ ദുരനുഭവങ്ങളും, പേടികളും , കടങ്ങളെ കുറിച്ചുള്ള കാര്യങ്ങളും, അതുമൂലം ഉണ്ടായ പ്രശ്നങ്ങളും , മുന്നേ ഉണ്ടായ സാമ്പത്തിക പ്രശ്നങ്ങളെ കുറിച്ചും, അപ്പോൾ ഉണ്ടായ അനുഭവങ്ങളെ കുറിച്ചും, ഭാവിയെ കുറിച്ചുള്ള പേടികളും , അങ്ങനെ അങ്ങനെ നിങ്ങളുടെ സകല പ്രശ്നങ്ങളും അതിൽ എഴുതാം. എന്നിട്ട് ആ പേപ്പർ കത്തിച്ചു കളയുക. കത്തിക്കുമ്പോൾ നിങ്ങളുടെ എല്ലാ ദുരിതങ്ങളും, പ്രശ്നങ്ങളും കത്തി തീരുന്നതായിട്ടും , അത് മനസ്സിൽ നിന്ന് ഡിലീറ്റ് ആകുന്നതായിട്ടും സങ്കല്പിക്കുക. ഇത് ഒരു തവണ മാത്രം ചെയ്താൽ മതി. നിങ്ങളെ ബുദ്ധിമുട്ടിക്കുന്ന എല്ലാ ചിന്തകളുടെയും തീവ്രത നന്നായി കുറഞ്ഞതായിട്ട് അനുഭവപ്പെടും. അവ ഇനി അങ്ങോട്ട് നിങ്ങളെ ബുദ്ധിമുട്ടിക്കില്ല. അങ്ങനെ നിങ്ങൾക് സമാധാനമായിട്ട് നിങ്ങൾ ചെയ്യേണ്ടുന്ന ജോലികൾ കൃത്യമായ് ചെയ്ത് മുന്നോട് പോകാം. അപ്പോൾ എല്ലാ പ്രശ്നങ്ങൾക്കുമുള്ള പരിഹാരങ്ങളും എളുപ്പത്തിൽ ലഭ്യമാകും. അത്പോലെ തന്നെ നിങ്ങള്ക്കുള്ള പല ബ്ലോക്കുകളും ഇതിലൂടെ മാറിക്കിട്ടും, അതും മുന്നോട്ടുള്ള ആഗ്രഹ സാക്ഷാത്ക്കാരങ്ങൾക്ക് നല്ല രീതിയിൽ സഹായകരമാകും. ### 2. വിഷൻ ബോർഡ്  വിഷൻ ബോർഡ് പലരും ഇതിനകം പരീക്ഷിച്ചിട്ടുള്ള ഏറ്റവും എളുപ്പമുള്ള ആവിഷ്‌ക്കാര വിദ്യകളിൽ ഒന്നാണ്. നിങ്ങളുടെ ജീവിതത്തിൽ നിങ്ങൾ സാധ്യമാക്കാൻ ആഗ്രഹിക്കുന്ന എല്ലാ കാര്യങ്ങൾക്കുമായി ഒരു ബോർഡ് ഉണ്ടാക്കുക. വീട്, ജോലി, കാർ, വ്യക്തിബന്ധങ്ങൾ, അങ്ങനെ നിങ്ങൾ സ്വപ്നം കാണുന്ന എല്ലാ ലക്ഷ്യങ്ങളുടെയും ചിത്രങ്ങളോ കൊളാഷുകളോ കൊണ്ട് സമ്പുഷ്ടമായ ഒരു വിഷൻ ബോർഡ് ഒരുക്കുക. അത് എപ്പോഴും നിങ്ങളുടെ ദൃഷ്ടി പതിക്കുന്ന സ്ഥലങ്ങളിൽ വെക്കുക. എത്ര മാത്രം കൃത്യത ആ ചിത്രങ്ങളിൽ പാലിക്കുന്നുവോ അത്രയും നല്ലത്. ഉദാഹരണത്തിന് നിങ്ങൾ നീല കാറാണ് ആഗ്രഹിക്കുന്നതെങ്കിൽ മനസ്സിലുള്ള കമ്പനിയുടെ അതേ നിറമുള്ള കാറിൻ്റെ ചിത്രം പതിപ്പിക്കുക. വിഷൻ ബോർഡുകൾ നിങ്ങൾ ആഗ്രഹിക്കുന്ന തരത്തിലുള്ള ജീവിതം വിഭാവനം ചെയ്യുന്നതിനുള്ള ഒരു മികച്ച മാർഗം മാത്രമല്ല, നിങ്ങൾ എന്തിനുവേണ്ടിയാണ് പ്രവർത്തിക്കുന്നത്, എന്തുകൊണ്ട് അത് വിലമതിക്കുന്നു എന്നതിൻ്റെ ഒരു ഓർമ്മപ്പെടുത്തൽ കൂടിയാണ്. ### 3. കൃതജ്ഞതാ ജേണൽ  ഒരു കൃതജ്ഞതാ ജേണൽ സൂക്ഷിക്കാൻ ശ്രമിക്കുക. അവിടെ നിങ്ങൾ ദിവസവും നന്ദിയുള്ള കാര്യങ്ങളുടെ ട്രാക്ക് സൂക്ഷിക്കുന്നു. ഇത് ആവിഷ്ക്കാരത്തിനുള്ള മാർഗ്ഗം മാത്രമല്ല, വിഷാദരോഗം അല്ലെങ്കിൽ ഉത്കണ്ഠയുമായി മല്ലിടുമ്പോൾ പലർക്കും സഹായകമാകുന്ന ഒരു സംഗതി കൂടിയാണ്. എഴുതുമ്പോഴുള്ള മനോഭാവത്തിലും പോസിറ്റീവ് ചിന്തയിലും ശ്രദ്ധ കേന്ദ്രീകരിക്കേണ്ടത് പ്രധാനമാണ്. ജീവിതത്തിൽ ഉള്ള നല്ല കാര്യങ്ങളിലേക്ക് ശ്രദ്ധിക്കാനാണ് ഇത് ചെയ്യുന്നത്. ഇത് ദിവസേന ചെയ്യുക. 10 മിനിറ്റ് സമയം മാത്രമാണ് ഇതിനു ആവശ്യമായ വരിക. ജീവിതത്തിൽ ഉള്ള 10-15 നല്ല കാര്യങ്ങൾ എഴുതി നന്ദി പറയുക. ഏറ്റവും ചെറിയ കാര്യങ്ങൾക്കും നന്ദി പ്രകടമാക്കുക. ജീവിതത്തിൽ വരാനിരിക്കുന്ന ആ ആഗ്രഹം ലഭിച്ചെന്ന മട്ടിൽ അത് നൽകിയതിനും നന്ദി പറയുക. ഓരോ വാചകം എഴുതുമ്പോഴും മുഖത്ത്‌ ഒരു പുഞ്ചിരിയോടെ, നല്ല വൃത്തിയിൽ വളരെ സ്നേഹത്തോടെ എഴുതാൻ ശ്രമിക്കുക – അങ്ങനെ നല്ല രീതിയിൽ ഫീൽ ചെയ്ത് തന്നെ ചെയ്യുക. നന്ദിയോടെയായിരിക്കണം നാം ഓരോ പ്രഭാതത്തെയും സ്വീകരിക്കേണ്ടത്. കാരണം ഒരു ദിവസം കൂടി നമുക്ക് ലഭിച്ചിരിക്കുന്നു. കാപ്പി കുടിക്കാൻ, സുഹൃത്തിന് വാട്സാപ്പ് ചെയ്യാൻ, ഇണയെ ആലിംഗനം ചെയ്യാൻ, മഴ നനയാൻ, സംഗീതം കേൾക്കാൻ, ജോലി ചെയ്യാൻ, മക്കളുടെ ചുംബനങ്ങൾ സ്വീകരിക്കാൻ. നാം ഉണർന്നെണീറ്റിരിക്കുന്നു എന്നതും നമ്മൾ ആരോഗ്യത്തോടെയിരിക്കുന്നു എന്നതുമാണ് പ്രധാനപ്പെട്ട കാര്യം. ഉദാഹരണത്തിന് ഇന്നലെ ഈ ലോകത്തിൻ്റെ വിവിധഭാഗങ്ങളിൽ നിന്നായി ഏകദേശം ലക്ഷോപലക്ഷം പേർ മരണമടഞ്ഞിട്ടുണ്ട്. റോഡപകടം, അക്രമം, രോഗം, പ്രകൃതിക്ഷോഭം എന്നിവയെല്ലാം കാരണമാണിത്. ഇന്നും അതുപോലെ തന്നെ ആളുകൾ മരിക്കും.നാളെയും മറ്റന്നാളും ഇത്തരം മരണങ്ങൾ ആവർത്തിക്കും. ഒരു കലണ്ടറിലെ അവസാനതാളും മറിഞ്ഞുകഴിയുമ്പോൾ ഈ ലോകത്ത് നിന്ന് കോടാനുകോടി ആളുകൾ തങ്ങളുടെ അവസാനശ്വാസമെടുത്തുകഴിഞ്ഞിരിക്കും. എന്തിനേറെ ഈ ലേഖനം വായിച്ചു തുടങ്ങി പൂർത്തിയാക്കുമ്പോഴേക്കും ഈ ലോകത്തിൽ നിന്ന് ചിലപ്പോൾ പത്തോ അതിലേറെയോ ആളുകൾ മരണമടഞ്ഞേക്കാം. എന്നിട്ടും ഇത് വായിക്കാൻ നിങ്ങൾ ജീവനോടെയുണ്ട് എന്നതു തന്നെയാണ് നിങ്ങൾ ഈ ദിവസത്തോടും ജീവിതത്തോടും കാണിക്കേണ്ട നന്ദി. നന്ദിയുള്ള ജീവിതം നന്മയുള്ള ജീവിതമാണ്. അത് നല്ലൊരു ജീവിതത്തിലേക്കുള്ള വാതിലുകളാണ് നമുക്ക് തുറന്നുതരുന്നത്. അതുകൊണ്ട് എല്ലാവരോടും എല്ലാറ്റിനോടും നന്ദിയുള്ളവരായിരിക്കുക. ### 4. പോസിറ്റീവ് അഫർമേഷൻ അഥവാ പോസിറ്റീവ് സ്ഥിരീകരണങ്ങൾ  പോസിറ്റീവ് സ്ഥിരീകരണങ്ങൾ മിക്കവാറും ആർക്കും പരീക്ഷിക്കാവുന്ന മറ്റൊരു മാനിഫെസ്റ്റേഷൻ വിദ്യയാണ്. നിങ്ങൾ ആഗ്രഹിക്കുന്ന ഫലം എന്തുതന്നെയായാലും, നിങ്ങളുടെ മാനസികാവസ്ഥ അതിന് പാകത്തിനായി ഒരുക്കുന്നതിനും ആത്മവിശ്വാസത്തിനും സ്ഥിരീകരണങ്ങൾ വളരെ പ്രധാനമാണ്. സ്റ്റിക്കി നോട്ടുകളിൽ പോസിറ്റീവ് സ്ഥിരീകരണങ്ങൾ എഴുതി നിങ്ങളുടെ റൂമിന് ചുറ്റും അല്ലെങ്കിൽ ബാത്ത്റൂം കണ്ണാടിയിൽ വയ്ക്കുന്ന ആശയം നല്ലതാണ്. നിങ്ങൾ ഉണരുമ്പോൾ ആദ്യം കാണുന്ന കാര്യങ്ങളിൽ ചിലത് ഈ പോസിറ്റീവ് സ്ഥിരീകരണങ്ങൾ ആണ്. നിങ്ങളുടെ ചിന്താഗതി പരിവർത്തനം ചെയ്യാനും നിങ്ങളുടെ നിഷേധാത്മക വിശ്വാസങ്ങളെ തച്ചുടയ്ക്കാനുമുള്ള എളുപ്പവഴിയാണിത്. തുടര്‍ച്ചയായി ചിന്തിക്കുന്ന ഏതുചിന്തകളും ആ ചിന്തകളുടെ തന്നെ തുടർശീലങ്ങൾ ഉണ്ടാക്കും. ദിവസവും മനസ്സിനോട് പോസിറ്റീവ് ചിന്തകള്‍ മാത്രം പങ്കുവയ്ക്കുമ്പോള്‍ മാത്രമേ തലച്ചോറില്‍ പോസിറ്റീവ് തരംഗങ്ങൾ രൂപപ്പെടുകയുള്ളൂ. ഉദാഹരണത്തിന് എന്നെക്കൊണ്ട് ഇതിനു സാധിക്കില്ല എന്ന ചിന്തയെ, എന്നെക്കൊണ്ട് ഇതിനു സാധിക്കും എന്ന വിപരീത ചിന്തകൊണ്ടാണ് മറികടക്കേണ്ടത്. മനസ്സിനോട് ദിവസവും ഇതു സാധിക്കും എന്ന് പറയുന്നതിലൂടെ ആ ചിന്തയെ മനസ്സില്‍ ഉറപ്പിക്കുകയും അതിലൂടെ കഴിയില്ല എന്ന തോന്നലിനെ ഇല്ലാതാക്കുകയുമാണ് ഇവിടെ ചെയ്യുന്നത്. ഇത്തരത്തില്‍ നിരന്തരമായ ചിന്തയിലൂടെ മനസ്സില്‍ ഒരു കാര്യം ഉറപ്പിക്കുന്ന പ്രക്രീയയാണ് അഫര്‍മേഷന്‍. ഏതുതരത്തിലുള്ള വ്യക്തിത്വമാണോ രൂപപ്പെടുത്താന്‍ ആഗ്രഹിക്കുന്നത് അത്തരത്തിലുള്ള ചിന്തകളെ പ്രോത്സാഹിപ്പിച്ച് മനസ്സില്‍ ഉറപ്പിക്കാനും അതുവഴി ലക്ഷ്യത്തിലേയ്ക്ക് എത്താനും അഫര്‍മേഷനിലൂടെ സാധിക്കും. എത്രത്തോളം പോസിറ്റീവ് ചിന്തകള്‍ മനസ്സില്‍ രൂപപ്പെടുത്താന്‍ സാധിക്കുന്നുവോ അത്രത്തോളം നെഗറ്റീവ് ചിന്തകള്‍ ഇല്ലാതാകും എന്നതാണ് യാഥാര്‍ഥ്യം. ഫലപ്രാപ്തിയിലേക്ക് എന്തെങ്കിലും സാധ്യമാക്കുന്നതിനുള്ള ഏറ്റവും വലിയ താക്കോലുകളിൽ ഒന്ന് നിങ്ങളുടെ ചിന്താഗതി മാറ്റുക എന്നതാണ്. നല്ല കാര്യങ്ങൾക്ക് പൊതുവെ സമയമെടുക്കും, നമ്മുടെ ലക്ഷ്യങ്ങൾ കൈവരിക്കാത്തപ്പോൾ ഒരു നെഗറ്റീവ് സ്പേസിലേക്ക് വഴുതിവീഴാൻ വളരെ എളുപ്പമാണ്. ആയതിനാൽ ശുഭാപ്തി വിശ്വാസം നിറയ്ക്കുക. പോസിറ്റീവ് ചിന്തകള്‍ മനസ്സ് തുടക്കത്തില്‍ തന്നെ അംഗീകരിക്കണമെന്നില്ല. പക്ഷേ നിരന്തരം ശ്രമിക്കുന്നതിലൂടെ പോസിറ്റീവ് ചിന്തകള്‍ മനസ്സില്‍ ഉറപ്പിക്കാന്‍ സാധിക്കും. ഇത്തരത്തില്‍ മനസ്സില്‍ നല്ല ചിന്തകള്‍ നിറയുമ്പോള്‍ ആത്മവിശ്വാസവും ധൈര്യവും വര്‍ദ്ധിക്കും. ജീവിതത്തിലെ എല്ലാ കാര്യങ്ങളേയും പോസിറ്റീവ് മനോഭാവത്തോടെ സമീപിക്കാന്‍ കഴിയും. മറ്റൊരുതരത്തില്‍ പറഞ്ഞാല്‍ മനസ്സിനെ മനസ്സു കൊണ്ടു തന്നെ ജയിക്കാനുള്ള തന്ത്രമാണ് അഫര്‍മേഷന്‍. നമ്മള്‍ എന്താണോ അത്, നമ്മള്‍ ചിന്തിക്കുന്നതിന്റെ ഫലമാണ്. ### 5. വിഷ്വലൈസേഷൻ അഥവാ ദൃശ്യവൽക്കരണം  മാനിഫെസ്റ്റേഷൻ ടെക്നിക്കുകളിൽ ദൃശ്യവൽക്കരണം ഏറ്റവും ശക്തമായ വിദ്യകളിൽ ഒന്നാണ്, മാത്രമല്ല ഇത് നമ്മൾ സാക്ഷാത്കരിക്കുന്നത് തിരിച്ചറിയാതെ തന്നെ ചെയ്യുന്ന ഒന്നാണ്. നിങ്ങളുടെ ആഗ്രഹങ്ങളുടെ ദൃശ്യവൽക്കരണം പരിശീലിക്കുക, നിങ്ങളുടെ മനസ്സ് തുറക്കുന്നതിനും നിങ്ങളുടെ ലക്ഷ്യങ്ങൾ നേടുന്നതിന് നിങ്ങളെ പ്രചോദിപ്പിക്കുന്നതിനും ഇത് വളരെ സഹായകരമാണ്. നിങ്ങള്‍ ആഗ്രഹിക്കുന്ന കാര്യങ്ങള്‍ നിലവില്‍ ഉണ്ടെന്ന് സങ്കല്‍പ്പിക്കുകയും അത് അനുഭവിക്കുകയും ചെയ്യുക എന്ന പ്രക്രിയയാണ് ക്രിയേറ്റീവ് വിഷ്വലൈസേഷൻ അഥവാ ഗോൾ വിഷ്വലൈസേഷൻ. മനസ്സ് ശാന്തമായും സ്വസ്ഥമായും വെക്കുക. അതിനുള്ള ഒരു എളുപ്പവഴി, 50 ല്‍ നിന്ന് പൂജ്യം വരെ പതുക്കെ എണ്ണുക എന്നതാണ്. നിങ്ങള്‍ ആഗ്രഹിക്കുന്ന കാര്യം നിലവില്‍ ഉണ്ടെന്നതു പോലെയും അനുഭവിക്കുന്നതു പോലെയും മനസ്സില്‍ സങ്കല്‍പ്പിക്കുക. കാണാനും കേള്‍ക്കാനും അനുഭവിക്കാനും മണക്കാനും രുചിക്കാനുമുള്ള (ആവശ്യമെങ്കില്‍) കഴിവുകള്‍ ഉള്‍പ്പെടുത്തി, അത് യാഥാര്‍ത്ഥ്യമാണെന്ന് വരുത്തിത്തീര്‍ക്കുക. നമ്മള്‍ ആഗ്രഹിക്കുന്ന കാര്യങ്ങള്‍ ഉണ്ടെന്ന വികാരം അനുഭവിക്കുക എന്നതാണ് ഏറ്റവും പ്രധാനം. ക്രിയേറ്റീവ് വിഷ്വലൈസേഷന്‍ ഉപയോഗിക്കുമ്പോഴെല്ലാം അത് ഇപ്പോള്‍ സംഭവിക്കുന്നതാണെന്ന തോന്നൽ ഉണ്ടാക്കുകയും അതിലുള്‍പ്പെടുന്ന പ്രക്രിയയെ ദൃശ്യവത്കരിക്കുന്നതിനപ്പുറം നിങ്ങളുടെ ശ്രദ്ധ അന്തിമഫലത്തിലോ ആഗ്രഹിക്കുന്ന ഫലത്തിലോ എത്തിക്കുകയും ചെയ്യുന്നു. അത് ആസ്വാദ്യകരവും രസകരവുമായ അനുഭവമാക്കി മാറ്റുക. എല്ലാറ്റിനുമുപരി നിങ്ങള്‍ ആഗ്രഹിക്കുന്നതെന്തും നല്ലതായി അനുഭവപ്പെടും. സ്വപ്നങ്ങള്‍ നേടിയെടുക്കാനുള്ള യാത്രയാണ് ഓരോരുത്തരുടേയും ജീവിതം. പരിശ്രമം കൊണ്ടു മാത്രം ഒരാള്‍ക്ക് ആ സ്വപ്നങ്ങള്‍ യാഥാര്‍ത്ഥ്യമാക്കാന്‍ കഴിയില്ല. എന്തു പ്രതിസന്ധികള്‍ നേരിട്ടാലും എത്ര തവണ പരാജയപ്പെട്ടാലും ഒരുനാള്‍ ഇത് നേടിയെടുക്കാന്‍ സാധിക്കും എന്ന വിശ്വാസം വേണം. ഇത്തരത്തില്‍ ശക്തമായൊരു ചിന്ത മനസ്സില്‍ രൂപപ്പെടുമ്പോള്‍ മാത്രമേ ഒരാള്‍ക്ക് വിജയത്തിലേയ്ക്ക് എത്തിച്ചേരാന്‍ സാധിക്കുകയുള്ളൂ. അതിനാല്‍ മനസ്സില്‍ ശുഭചിന്തകള്‍ നിറയട്ടെ. അതുവഴി ധൈര്യവും ആത്മവിശ്വാസവും വളരട്ടെ. അപ്പോള്‍ മാത്രമേ കടന്നു പോകുന്ന ഓരോ വഴിയിലും വിജയത്തിന്‍റെ പാദമുദ്രകള്‍ പതിപ്പിക്കാന്‍ നിങ്ങള്‍ക്ക് സാധിക്കുകയുള്ളൂ.
കേരളത്തിലെ കൂൺ ബിസിനസ്സ്
മഴക്കാലത്ത് തൊടികളിൽ പൊടിച്ച് വളർന്ന് നിൽക്കാറുള്ള കൂണുകളെ കണ്ടിട്ടില്ലേ നിങ്ങൾ? എത്ര പേർ അത് പറിച്ചു കറിവച്ചു കഴിച്ചിട്ടുണ്ട്? കൂൺ വിഭവങ്ങൾ കഴിച്ചവർ വീണ്ടും വീണ്ടും കഴിക്കാൻ ആഗ്രഹിക്കും. സസ്യാഹാരികൾക്കിടയിലെ മാം കൂണ്. കൂണിന് വേണ്ടി മഴക്കാലം വരെ കാത്തിരിക്കുന്ന പതിവ് മലയാളികൾ ഇപ്പൊ തെറ്റിച്ച് തുടങ്ങി. സ്വന്തമായി കൂൺ കൃഷി ചെയ്യാനും അതിൽ വലിയ ലാഭങ്ങൾ വരെ ഉണ്ടാക്കാനും തുടങ്ങിയിരിക്കുന്നു. നമുക്ക് ആദ്യം കൂണിനെക്കുറിച്ച് കുറച്ചു കാര്യങ്ങളും അറിഞ്ഞിരിക്കാം. ## കൂണിനെക്കുറിച്ച്  കൂൺ എന്നത് ഒരു സസ്യമല്ല, അതൊരു ഫംഗസ്സാണ്. അതെ, നനവുള്ള പ്രദേശങ്ങളിൽ കണ്ടുവരുന്ന പൂപ്പൽ വിഭാഗത്തിലെ ഒരു കണ്ണിയാണ് കൂൺ. ഹരിതകം ഇല്ലാത്തതിനാലാണ് കൂണിനെ സസ്യമായി പരിഗണിക്കാത്തത്. ഉണങ്ങിയ മരങ്ങളുടെ മുകളിലോ ചതുപ്പ് പ്രദേശങ്ങളിലോ ഒക്കെ കുടയുടെ ആകൃതിയിൽ വളരുന്ന പൂപ്പലാണ് കൂൺ. കൂണുകൾ അങ്ങനെ കുറെ നാള് വളർന്ന് നിൽക്കുന്നവയല്ല. പെട്ടെന്ന് തന്നെ കേടായിപോകുന്നതാണ്. കൂണുകളിൽ ആഹാരയോഗ്യവും വിഷമുള്ളവയും ഉണ്ട്. കൂണുകൾ പലതരത്തിലാണ് കാണപ്പെടുന്നത്. ലോകത്ത് ഏകദേശം 45000 തരത്തിലുള്ള കൂണുകൾ ഉണ്ടെങ്കിലും അവയിൽ ഭക്ഷ്യയോഗ്യമായത് വെറും രണ്ടായിരത്തോളമേ ഉണ്ടാകൂ. അതിൽ തന്നെ 20-25 തരത്തിലുള്ള കൂണുകൾ മാത്രമേ വാണിജ്യാടിസ്ഥാനത്തിൽ കൃഷി ചെയ്യുന്നുള്ളൂ. ## കൂൺ ഉത്പാദനം  കുറഞ്ഞ നിക്ഷേപത്തിലും കുറഞ്ഞ സ്ഥലത്തും ആർക്കും ആരംഭിക്കാൻ കഴിയുന്ന ഏറ്റവും ലാഭകരമായ കാർഷിക ബിസിനസ്സാണ് കൂൺ കൃഷി. ഇന്ത്യയിലെ കൂൺ കൃഷി നിരവധി ആളുകളുടെ ഒരു ബദൽ വരുമാന മാർഗ്ഗമായി ക്രമേണ വളരുകയാണ്, കേരളത്തിലും ആ പ്രവണത കണ്ടുവരുന്നു. ഭാരതത്തിൽ വ്യാവസായികമായി കൂൺ കൃഷി ആദ്യം തുടങ്ങിയത് 1992-ൽ ഹിമാചൽ പ്രദേശിലാണ്. ഇപ്പോൾ ജമ്മു കശ്മീരിലും, ഉത്തർ പ്രദേശിലും, കേരളത്തിലും നല്ല രീതിയിൽ കൂൺ കൃഷി നടത്തി വരുന്നു. ലോകത്ത് വിവിധ തരത്തിലുള്ള കൂണുകൾ ഉണ്ട്. ചിപ്പി കൂൺ, പാൽ കൂൺ, വൈക്കോൽ കൂൺ, ബട്ടൺ കൂൺ, ഷിറ്റേക്ക് മഷ്റൂം, വിന്‍റര്‍ മഷ്റൂം, കോപ്രിനസ് മഷ്റൂം, നമേകോ മഷ്റൂം, ഗാര്‍ഡന്‍ ജയൻ്റ്, സില്‍വര്‍ ഇയര്‍ കൂൺ എന്നിവയാണ് അവയിൽ ചിലത്. ലോകത്തില്‍ മൊത്തം ഉത്പാദിപ്പിക്കുന്ന കൂണ് ഇനങ്ങളില്‍ ഒന്നാം സ്ഥാനം വൈറ്റ് ബട്ടൺ കൂണിനും രണ്ടാം സ്ഥാനം ചിപ്പിക്കൂണിനുമാണ്. കേരളത്തിൽ കൂടുതലായി കണ്ടുവരുന്നത് ചിപ്പി കൂൺ, പാൽ കൂൺ, വൈക്കോൽ കൂൺ, ബട്ടൺ കൂൺ എന്നീ തരങ്ങളാണ്. `_BANNER_` ബട്ടൺ കൂൺ കേരളത്തിൽ കൃഷി ചെയ്യണമെങ്കിൽ ചൂട് ക്രമീകരിച്ചു 14-15 സെൽഷ്യസ് ആയി നിർത്തേണ്ടി വരും. അതുകൊണ്ട് തന്നെ ഉത്പാദന ചിലവ് കൂടുതലാണ്. വലിയ കമ്പനികൾ മാത്രമേ കേരളത്തിൽ ബട്ടൺ കൂൺ ഉത്പാദിപ്പിക്കുന്നുള്ളൂ. ### ചിപ്പി കൂൺ കേരളത്തിൻ്റെ കാലാവസ്ഥയിൽ കൂടുതലും കൃഷി ചെയ്യാനായിട്ട് അനുയോജ്യമായതാണ് ചിപ്പി കൂൺ. ഇത് 25 ഡിഗ്രി മുതൽ 35 ഡിഗ്രി വരെയുള്ള ഊഷ്മാവിലാണ് വളരുന്നത്. ഭക്ഷ്യയോഗ്യമായ ഈ കൂൺ ശരീരത്തിന് വളരെ ഗുണം ചെയ്യുകയും മാരകമായ രാസവസ്തുക്കളെ തകർക്കുകയും ചെയ്യുന്നു. ഭൂമിയിലെ ഏറ്റവും വൈവിധ്യമാർന്ന കൂണുകളിൽ ഒന്നാണ് ചിപ്പി കൂൺ. ചിപ്പി കൂൺ എളുപ്പത്തിൽ കൃഷി ചെയ്യാം.ചിപ്പികൂണിൻ്റെ മുൻ നിര ഇനമായ ഗാനോഡെർമ ലൂസിഡിയം കൂൺ വളരാൻ ഏകദേശം 100 ദിവസമെടുക്കും. ഇവ ആന്റിഓക്‌സിഡന്റ് ഗുണങ്ങൾക്ക് പേരുകേട്ടതാണ്. ### പാൽ കൂൺ ഉഷ്ണമേഖല പ്രദേശങ്ങളിൽ മാത്രം വളരുന്ന ഇനമാണ് പാൽ കൂൺ. ഇന്ത്യയിലെ ചൂടുള്ള ഈർപ്പമുള്ള കാലാവസ്ഥയിൽ തദ്ദേശീയവും കൃഷി ചെയ്യുന്നതുമായ ഒരേയൊരു കൂൺ ഇനമാണ് പാൽ കൂൺ. പാലിൻ്റെ വെളുത്ത നിറമായതുകൊണ്ടാണ് ഈ കൂണിന് പാൽ കൂൺ എന്ന പേര് വിളിക്കുന്നത്. പാൽ കൂണുകൾ പോഷകങ്ങളാൽ സമ്പന്നമാണ്, നല്ല സെൽഫ് ലൈഫും ഉണ്ട്. കുറഞ്ഞ ചെലവിൽ വളർത്താൻ പറ്റുന്ന ഇനങ്ങളിൽ ഒന്നാണിത്. കൂടാതെ വലുപ്പത്തിൽ വലുതും. ### വൈക്കോൽ കൂൺ രുചി, മണം, സ്വാദിഷ്ടത, പോഷകങ്ങൾ എന്നിവയുടെ കൂട്ടമാണ് വൈക്കോൽ കൂൺ. അതുകൊണ്ട് തന്നെ വെളുത്ത ബട്ടൺ കൂണുകൾക്ക് തുല്ല്യം തന്നെയാണ് വൈക്കോൽ കൂൺ. ഉഷ്ണമേഖലാ വൈക്കോൽ കൂൺ എല്ലാ സീസണുകൾക്കും അനുയോജ്യമാണ്. എന്നാൽ വളരെ കുറഞ്ഞ വിളവും വളരെ കുറഞ്ഞ സെൽഫ് ലൈഫ് കാരണം വാണിജ്യപരമായി ഇത് ആകർഷകമല്ല. പക്ഷേ, ഒരു അടുക്കളത്തോട്ട വിള എന്ന നിലയിൽ ഇത് വളരെ രുചികരവും പോഷകപ്രദവുമാണ്. ## കൂണിൻ്റെ ഗുണങ്ങൾ  ഭൂരിഭാഗവും വെള്ളം കൊണ്ട് നിറഞ്ഞ ഭക്ഷ്യയോഗ്യമായ പൂപ്പലാണ് കൂൺ. വിറ്റാമിനുകൾ, ധാതുക്കൾ, പ്രോട്ടീൻ, ഫോളിക് ആസിഡ്, അയേൺ എന്നിവയ്ക്കും മറ്റും ഒരു മികച്ച ഉറവിടം കൂടിയാണ് കൂൺ. മാംസങ്ങളിലെ പ്രോട്ടീനെ അപേക്ഷിച്ച് കൂണിലെ പ്രോട്ടീൻ ഗുണത്തിൽ നല്ലതായി നിൽക്കുന്നു. കൊഴുപ്പ് കുറവുള്ള പോഷകാഹാരത്തിന്റെ സമ്പന്നമായ ഉറവിടമാണ് കൂണുകൾ. അതുകൊണ്ട് തന്നെ, ഹൃദയാരോഗ്യത്തിനും രോഗപ്രതിരോധ ശക്തി വർധിപ്പിക്കുന്നതിനും കൂണുകൾ നല്ലതാണ്. കൂണിന് ക്യാൻസർ, ട്യൂമർ, കൊളസ്ട്രോൾ, രക്തസമ്മർദം മുതലായ രോഗങ്ങളെ നിയന്ത്രിക്കുന്നതിനുള്ള കഴിവുണ്ട്. കൂൺ ഒരു ഔഷധം കൂടിയാണ്. വൃണം ചൊറി എന്നിവയിൽ കൂൺ ഒണക്കി പൊടിച്ചത് വിതറിയാൽ പെട്ടെന്ന് ഉണങ്ങും. ഹോമിയോ മരുന്നുകളിലും ചില പ്രത്യേകതരം കൂണുകൾ ഉപയോഗിക്കുന്നുണ്ട്. ഇത്രയും പോഷക സമൃദ്ധമായതും ഔഷധ മൂല്യമുള്ളതുമായ കൂൺ പക്ഷേ വിലയിൽ മുന്തിയത് ആയതുകൊണ്ട് പലരും വാങ്ങാൻ മടിക്കുന്നു. സാധാരണ കൂണിന് വിപണിയിൽ കിലോയ്ക്ക് 300-350 രൂപയാണ് വില. എന്നാൽ എളുപ്പത്തിൽ വീട്ടിലുണ്ടാക്കാവുന്ന വിളയാണ് കൂൺ എന്നത് അറിഞ്ഞിരിക്കണം. ## കൂൺ കൃഷി എങ്ങനെ ചെയ്യാം  കൂണിൻ്റെ ഗുണങ്ങളും ഔഷധ പ്രാധാന്യവും കണക്കിലെടുത്തും ദൗർലഭ്യം മൂലവും ഇപ്പോൾ വാണിജ്യപരമായുള്ള കൂണിൻ്റെ കൃഷി കൂടി കൂടി വരുന്നുണ്ട്. ഈയിടെയായി കേരളത്തിൽ കൂടുതലായി കൂൺ കൃഷിക്കാരുടെ എണ്ണം കൂടിയിട്ടുണ്ട്. വീടുകളിൽ വരെ കൂൺ കൃഷി തുടങ്ങാം എന്നത് വീട്ടമ്മമാരെ കൂടി ഇതിലേക്ക് ആകർഷിക്കുന്നുണ്ട്. കേരളത്തിൽ കൂൺ കൃഷി ഒരു ഹോബിയിൽ നിന്ന് ഒരു മിനി വ്യവസായമായി വളർന്ന് കഴിഞ്ഞു. സ്ഥിരോത്സാഹവും കഷമയും ബുദ്ധിപരമായ നിരീക്ഷണ പാടവവും കൂടാതെ ട്രെയിനിങ്ങും പ്രവർത്തി പരിചയവും ഒക്കെ വേണ്ട തൊഴിലാണ് കൂൺ കൃഷി. എന്നാൽ മറ്റേതൊരു ജോലിയെയും പോലെ മികച്ച വരുമാനം നല്‍കുന്ന കൃഷിയാണ് കൂണ് കൃഷി. ### 1. സ്ഥലം കൂൺ കൃഷിക്ക് ആദ്യം കണ്ടെത്തേണ്ടത് അനുയോജ്യമായ സ്ഥലമാണ്. സൂര്യപ്രകാശം കുറവുള്ളതും ചൂട് കുറഞ്ഞതും ഈർപ്പമുള്ള അന്തരീക്ഷമുള്ളതും വായുസഞ്ചാരമുള്ളതുമായ സ്ഥലം വേണം തിരഞ്ഞെടുക്കാൻ. ഗാർഹിക ആവശ്യത്തിനായി കൂൺ കൃഷി നടത്തുകയാണെങ്കിൽ സ്വന്തം വീട്ടിൽ തന്നെ അതിനുള്ള അന്തരീക്ഷം ഒരുക്കാവുന്നതാണ്. വാണിജ്യപരമായ ഉത്പാദനത്തിന് ഇത്തരം കാര്യങ്ങൾ ഒത്തുചേർന്നു വരുന്ന ഒരു ശാല നിർമ്മിക്കേണ്ടി വരും. ### 2. കൂൺ വിത്ത് കൂൺ കൃഷി തുടങ്ങാൻ നല്ല സപോ വേണം. കൂൺ കൃഷി ചെയ്യാൻ ആവശ്യമായ വിത്തിനെയാണ് സ്പോ എന്ന് വിളിക്കുന്നത്. അറിവും പരിചയവും വിശ്വാസയോഗ്യവുമായ സ്ഥലത്ത് നിന്ന് സ്പോ വാങ്ങാൻ ശ്രദ്ധിക്കണം. ### 3. തടമൊരുക്കാൻ മാധ്യമങ്ങൾ അടുത്തതായി കൂൺ കൃഷിക്ക് വേണ്ടത് അനുയോജ്യമായ തടം ആണ്. കൂണിനു അനുയോജ്യമായി വളർത്താൻ ഉപയോഗിക്കുന്ന പ്രതലത്തെ (തടത്തെ) കൂൺ ബെഡ് എന്ന് വിളിക്കുന്നു. കൂൺ ബെഡ് ഒരുക്കാനായി പല തരം മാധ്യമങ്ങൾ ഉപയോഗിക്കാം. വൈക്കോൽ, ഉണങ്ങിയ അടയ്ക്കാത്തോട്, തെങ്ങിൻ്റെ കൊതുമ്പു, ഓല മടൽ, ഉണങ്ങിയ കൈതപുല്ല്, വാഴത്തട, അറക്കപ്പൊടി അങ്ങനെ പലതും. എന്നാൽ കൂടുതലായി ഉപയോഗിക്കുന്നത് വൈക്കോൽ ആണ്. ആദായകരമായ വിളവ് ലഭിക്കണമെങ്കിൽ ഒരുവർഷത്തിൽ കൂടുതൽ പഴക്കമില്ലാത്ത വൈക്കോൽ എടുക്കുന്നതായിരിക്കും ഉത്തമം. ### 4. അണുനശീകരണം ബെഡിനായി തിരഞ്ഞെടുക്കുന്ന വൈക്കോൽ അണുനശീകരണം ചെയ്യണം. അതിനായി വൈക്കോൽ ഏകദേശം 12-14 മണിക്കൂർ വരെ ശുദ്ധമായ വെള്ളത്തിൽ കുതിർക്കണം. മണിക്കൂറുകൾ കഴിഞ്ഞ് വെള്ളത്തിൽ നിന്നും എടുത്ത് പുഴുങ്ങാനായി വയ്ക്കണം. വെള്ളത്തിലോ ആവിയിലോ ഇട്ടു വൈക്കോൽ പുഴുങ്ങാവുന്നതാണ്. ഏകദേശം 45 മിനിറ്റ് കഴിയുമ്പോൾ വയ്ക്കോൽ എടുത്ത് അധിക ജലം പോകുന്നതിനും തണുക്കുന്നതിനുമായി എടുത്ത് മാറ്റി വയ്ക്കാം. കൂൺ വിത്ത് വിതറുന്ന സ്ഥലം അനുനശീകരണം ചെയ്യാൻ ആണ് ഇതൊക്കെ ചെയ്യുന്നത്. ### 5. ബെഡ് തയ്യാറാക്കൽ നല്ല കട്ടിയുള്ള പ്ലാസ്റ്റിക് കവർ ആണ് കൂൺ ബെഡ് തയ്യാറാക്കാൻ ഉത്തമം. അത് സുതാര്യമാണെങ്കിൽ കൂൺ വളരുന്നത് എളുപ്പം കാണാനും കഴിയും. തിളപ്പിച്ച് ഉണക്കി അണുരഹിതമാക്കി വച്ചിരിക്കുന്ന വൈക്കോൽ എടുത്ത് പ്ലാസ്റ്റിക്ക് കവറിൻ്റെ അടിഭാഗത്ത് വയ്ക്കുക. അതിനു വശങ്ങളിലായി കൂൺ വിത്തുകൾ വിതറാവുന്നതാണ്. അതിനു മുകളിൽ അട്ടിയട്ടിയായി വൈക്കോലും കൂൺ വിത്തും കൊണ്ട് നിറയ്ക്കാം. അതുകഴിഞ്ഞ് പ്ലാസ്റ്റിക്ക് കവർ മുകളിൽ നിന്നും ഒരു ചരട് ഉപയോഗിച്ച് കെട്ടിവയ്ക്കാം. കവറിൻ്റെ എല്ലാ വശങ്ങളിലും ചെറു സുഷിരങ്ങൾ ഇടാം. ഇങ്ങനെ ഉണ്ടാക്കിയെടുത്ത കാര്യത്തെയാണ് കൂൺ ബെഡ് അഥവാ കൂൺ തടം എന്ന് പറയുന്നത്. ബെഡ് തയ്യാറാക്കുന്നതിന് മുൻപ് ഇതിന് ഉപയോഗിക്കുന്ന എല്ലാ സാധനങ്ങളും കൈകളും ഡെറ്റോൾ ഉപയോഗിച്ചു കഴുകണം. തയ്യാറാക്കിയ ബെഡുകൾ സൂര്യപ്രകാശം ഏൽക്കാത്ത സ്ഥലത്ത് വയ്ക്കുക. ### 6. വിളവെടുപ്പ് അങ്ങനെ വച്ചിരിക്കുന്ന കൂൺ വീടുകളിൽ ഏകദേശം 10 ദിവസം കഴിയുമ്പോൾ ചെറുതായി കൂൺ വളരുന്നത് കാണാനാകും. രണ്ടു ദിവസം കൂടി കഴിഞ്ഞാൽ കൂൺ മുളകൾ പുറത്തേക്ക് വളർന്ന് തുടങ്ങും. ഈ അവസ്ഥയിൽ പ്ലാസ്റ്റിക്ക് കവർ കീറി കൂൺ ബെഡ് പുറത്തെടുക്കാവുന്നതാണ്. കൂൺ ബെഡ് പുറത്തെടുത്ത് അടുത്ത ദിവസം മുതൽ ഈർപ്പം നിലനിർത്താനുള്ള വെള്ളം തളിച്ച് കൊടുക്കണം. 2-4 ദിനങ്ങൾക്കുള്ളിൽ കൂൺ പൊട്ടി മുളച്ച് വിളവെടുപ്പിനുള്ള പാകമായിട്ടുണ്ടാകും. അപ്പോൾ വിളവെടുക്കാം. വിളവെടുപ്പ് കഴിഞ്ഞാലും കുറച്ചു വെള്ളം തളിച്ച് കൊടുക്കുക. അങ്ങനെ ചെയ്താൽ അടുത്ത രണ്ടാഴ്ചകളിലായി വീണ്ടും വിളവെടുപ്പ് നടത്താവുന്നതാണ്. വിളവെടുപ്പ് കഴിഞ്ഞുള്ള ബെഡ് ഒന്നുങ്കിൽ കത്തിച്ചു കളയാം അല്ലെങ്കിൽ മണ്ണിര കമ്പോസ്റ്റ് പോലുള്ള കാര്യങ്ങൾ ഉണ്ടാക്കാൻ എടുക്കാം. ## കൂൺ കൃഷി എങ്ങനെ പഠിക്കാം  വളരെ എളുപ്പത്തിൽ ചെയ്യാവുന്ന കൃഷിയാണ് കൂൺ കൃഷി. പക്ഷേ വിദഗ്ദ്ധരുടെ ഉപദേശമോ കൃത്യമായ ട്രെയിനിങ്ങോ ഇല്ലാതെ ചെയ്താൽ നഷ്ടമാകാനും സാധ്യതയുണ്ട്. അതുകൊണ്ട് തന്നെ വീട്ടിലെ ആവശ്യങ്ങൾക്ക് വേണ്ടി മാത്രമായി കൂൺ കൃഷി തുടങ്ങുന്നതാണ് ഉത്തമം. ചെറിയ തോതിൽ തുടങ്ങി പിന്നീട് അതൊരു വ്യവസായമായി മാറ്റാം. നമ്മുടെ നാട്ടിലെ കാർഷിക സർവകലാശാല ഗവേഷണ കേന്ദ്രങ്ങളിൽ നിന്നും കൃഷി വിജ്ഞാന കേന്ദ്രങ്ങളിൽ നിന്നും കൂൺ കൃഷി രീതികളെക്കുറിച്ചും വിത്ത് ഉത്പാദിപ്പിക്കുന്നതിനെക്കുറിച്ചും ഉള്ള പരിശീലനം ലഭിക്കുന്നതാണ്. പലരും യൂട്യൂബിലൂടെയും കൃഷി പഠിക്കുന്നുണ്ട്. ## കൂൺ കൃഷി കൊണ്ട് മറ്റ് സംരംഭങ്ങൾ  കൂൺ കൃഷി ചെയ്യുന്നതിൻ്റെ കൂടെത്തന്നെ അതിനോടനുബന്ധിച്ച മറ്റു വ്യവസായങ്ങളും തുടങ്ങാവുന്നതാണ്. കൂൺ കൊണ്ടുണ്ടാക്കുന്ന വിഭവങ്ങൾക്ക് ആവശ്യക്കാർ ഏറെയാണ്. വിഭവങ്ങൾക്ക് വേണ്ടിയുള്ള കൂൺ സ്വന്തമായി ഉത്പാദിപ്പിക്കുന്നതുകൊണ്ട് തന്നെ അതിൽ ലാഭവും ഉണ്ടാക്കാം. കൂൺ കൊണ്ട് അച്ചാർ, കെച്ചപ്പ്, സോസ് തുടങ്ങിയവയൊക്കെ ഉണ്ടാക്കി ടിന്നിലാക്കി വിൽക്കാവുന്നതാണ്.ചെറു കടികളായ കൂണ് കട്ലേറ്റ്, കൂണ് ഓംലെറ്റ്, കൂണ് ബജി, കൂണ് പക്കാവട പോലുള്ള സാധനങ്ങളും വിപണിയിൽ വിറ്റാൽ അതിലും ലാഭം കിട്ടും. കൂൺ പൊടിച്ച് കുപ്പിയിലാക്കി വിൽക്കുകയും ചെയ്യാം. ജ്യൂസിലോ പാലിലോ ഒക്കെ കലക്കി കഴിക്കാൻ നല്ലതാണ്.ലാഭകരമായ കൂൺ ബിസിനസ്സ് താല്പര്യമുള്ളവർക്ക് ഒന്നു ശ്രമിച്ചു നോക്കാവുന്നതാണ്.
കേരളത്തിൽ ചന്ദനത്തിരി നിർമ്മാണം തുടങ്ങുമ്പോൾ ശ്രദ്ധിക്കേണ്ട കാര്യങ്ങൾ
മിതമായ സൗകര്യത്തിൽ ആർക്കും വളരെ എളുപ്പത്തിൽ തുടങ്ങാൻ പറ്റിയ ഒരു സംരംഭമാണ് ചന്ദനത്തിരി നിർമ്മാണം. കേരളത്തിൽ കുടിൽ വ്യവസായം എന്ന രീതിയിലാണ് ഈ സംരംഭം കൂടുതലായി ശീലിച്ചു പോന്നിട്ടുള്ളത്. നമ്മുടെ നാട്ടിൽ ചന്ദനത്തിരി നിർമ്മാണം വളരെ കുറച്ചു മാത്രമേ കാണാൻ സാധിക്കൂ. മലനാട്ടിലെ ചന്ദനത്തിരികളാണ് ഇവിടെ കൂടുതലും വിറ്റഴിക്കപ്പെടുന്നത്. കേരളത്തിൽ എല്ലാ മത വിഭാഗക്കരും വിശേഷ ദിവസങ്ങളിൽ ഉപയോഗിക്കുന്ന ഒരു വസ്തുവാണ് ചന്ദനത്തരി. ആഘോഷ - ഉത്സവ ദിവസങ്ങളിൽ ഏറ്റവും കൂടുതൽ വിറ്റഴിക്കപ്പെടുന്ന ഉത്പന്നം എന്ന രീതിയിൽ മികച്ച സംരംഭമാണിത്. വനിതകൾക്കും ശാരീരിക ശേഷികുറവുള്ളവർക്കും പ്രവാസ ജീവിതം നിർത്തി പോന്നവർക്കും ചെയ്യാവുന്ന ഒരു നല്ല തൊഴിലാണ്. ചെറിയ ഒരു സംഖ്യയാണ് ഉത്പന്നത്തിന്റെ യഥാർത്ഥ വിലയെങ്കിലും വലിയ വിപണി വിഹിതം നേടി തരുന്നു. വിപണിയിലെ സാധ്യതകൾ, ബ്രാൻഡിങ് തുടങ്ങിയ കാര്യങ്ങൾ മനസ്സിലാക്കിയാൽ ചന്ദനത്തിരി നിർമ്മാണത്തിൽ നിന്നും വൻ തോതിൽ ലാഭം കൊയ്യാം. കുറഞ്ഞ നിലവാരം പുലർത്തുന്ന സാങ്കേതിക വിദ്യയും മികച്ച കയറ്റുമതിയും ഉണ്ടായാൽ തന്നെ വിജയകരമായി മുന്നോട്ട് കൊണ്ടുപോകാനാകും എന്നതാണ് മറ്റൊരു നേട്ടം. സംരംഭകന്റെ കഴിവിനെയും വിപണി ആവശ്യകതയെയും ഉത്പാദന തോതിനെയും ഈ സംരംഭത്തിന്റെ ലാഭം വലിയ രീതിയിൽ ആശ്രയിക്കുന്നു. സാങ്കേതിക പ്രശ്നങ്ങളില്ലാത്ത പ്രക്രിയയാണ് ചന്ദനത്തിരി നിർമ്മാണത്തിന്റേത്. ## സംരംഭഘട്ടങ്ങൾ  ### 1. ഗവേഷണം ചന്ദനത്തിരി നിർമ്മാണ മേഖലയിൽ നല്ല ഗവേഷണം നടത്തിയവർക്ക് എളുപ്പത്തിൽ വിജയിക്കാനാകും. നിക്ഷേപ തുക കണ്ടെത്താനുള്ള വഴി, വരവു ചിലവിനെ പറ്റിയുള്ള മുൻധാരണ, സാങ്കേതിക മേഖല, വിപണി സാധ്യതകൾ ഇവയെല്ലാം വിലയിരുത്തുന്നതിനായി പദ്ധതിയെ പറ്റി വ്യക്തമായ അവലോകനം നടത്തുന്നത് നല്ലതായിരിക്കും. ഭാവിയിൽ വളരെ നല്ല രീതിയിൽ ഇത് ഉപകാരപ്പെടും. സാധാരണ ചന്തകളിലും കടകളിലും ലഭിക്കുന്ന ചന്ദനത്തിരികളുടെ ബ്രാൻഡ്, അവയിൽ അടങ്ങിയിട്ടുള്ള സ്റ്റിക്കുകളുടെ എണ്ണം, ഗുണമേന്മ, സുഗന്ധം തുടങ്ങിയവയെ പറ്റി ഗവേഷണങ്ങൾ നടത്താം. ഉപഭോക്താക്കളുടെ ആവശ്യങ്ങൾ അറിഞ്ഞു വെക്കുന്നതും നിങ്ങളുടെ ചന്ദനത്തിരി നിർമ്മാണ സംരംഭം സുഗമമാക്കും. ### 2. ധന സമാഹരണം പ്രാഥമിക നിക്ഷേപം വളരെ കുറഞ്ഞ രീതിയിൽ ആവശ്യമുള്ള ഒരു മേഖലയാണ് ചന്ദനത്തിരി നിർമ്മാണം. ഏകദേശം ഒരു ലക്ഷം മുതൽ മൂന്ന് ലക്ഷം രൂപ വരെ മുതൽമുടക്ക് ആയിട്ട് കണക്കാക്കാം. നിർമ്മാണ ചിലവുകൾ സ്വന്തമായി സ്വരൂപിക്കാം. അല്ലെങ്കിൽ ബാങ്ക് ലോൺ, സർക്കാർ ഫണ്ടുകൾ തുടങ്ങിയവയോ ആശ്രയിക്കാം. കേരളത്തിൽ കുടിൽ വ്യവസായങ്ങൾ പ്രോത്സാഹിപ്പിക്കുന്നതിന് സർക്കാർ ഒരുപാട് പദ്ധതികൾ നടപ്പിലാക്കുന്നുണ്ട്. അതിനാൽ തന്നെ സംരംഭത്തെ പറ്റിയുള്ള വ്യക്തമായ ആശയം നൽകുകയാണെങ്കിൽ തീർച്ചയായും നിങ്ങൾക്ക് സർക്കാരിന്റെ ഭാഗത്തു നിന്നും ധനസഹായം ലഭിക്കും. മെഷിനറിക്ക് വ്യവസായ വകുപ്പിൽനിന്നും സബ്സിഡി ലഭിക്കാൻ സാധ്യതയുണ്ട്. തുടക്കത്തിൽ 2 മുതൽ 8 തൊഴിലാളികൾ വരെ മതിയാകും. അവർക്കുള്ള വേതനം കണ്ടെത്താൻ പറ്റണം. പാക്കിങ് സാധനങ്ങൾ, അസംസ്കൃത വസ്തുക്കൾ, തേയ്മാനം, പെട്ടെന്നുള്ള അത്യാഹിതങ്ങൾ തുടങ്ങിയവ അഭിമുഖീകരിക്കുന്നതിനുമുള്ള ഫണ്ട് കരുതുക. രണ്ട് മൂന്ന് ലക്ഷം രൂപയാണ് ഇത്തരം കാര്യങ്ങൾക്കായി ചിലവാകുന്ന ഏകദേശ തുക. ചന്ദനത്തിരി നിർമ്മിക്കുന്നതിനുള്ള മെഷീൻ, പ്രീമിക്സ്, സ്റ്റിക്ക്, പെർഫ്യൂം, തുടങ്ങിയവ വാങ്ങുന്നതിനുള്ള ചിലവാണ് പ്രധാന മുതൽമുടക്ക്. മെഷിനറിയുടെ വില 70,000 രൂപ വരെയാണ്. ഫർണിചർ, മറ്റു സജ്ജീകരണങ്ങൾ, വിപണിയിൽ എത്തിക്കാനുള്ള ഗതാഗത ചിലവുകൾ, പരസ്യം തുടങ്ങിയ കാര്യങ്ങൾക്കും ഫണ്ട് അത്യാവശ്യമാണ്. ### 3. വ്യവസായ അനുമതിയും (Business License) രജിസ്‌ട്രേഷനും (Business Registration) ചെറുകിട കുടിൽ വ്യവസായങ്ങളുടെ പട്ടികയിലാണ് ചന്ദനത്തിരി നിർമ്മാണം വരുന്നത്. അതിനാൽ തന്നെ സംരംഭം ആരംഭിക്കാൻ ഉദ്ദേശിക്കുന്ന സ്ഥലത്തെ മുൻസിപ്പാലിറ്റിയോ അല്ലെങ്കിൽ കോർപ്പറേഷനോ ആയി ബന്ധപ്പെട്ടാൽ ഉടൻ തന്നെ ലൈസൻസ് ലഭിക്കുന്നതാണ്. SSI യുടെ കീഴില്‍ രജിസ്‌ട്രേഷൻ ചെയ്യുന്നത് ചന്ദനത്തിരി നിർമ്മാണ സംരംഭത്തിൽ നിർബന്ധമല്ല. പക്ഷെ ഒരു ചെറുകിട വ്യവസായ യൂണിറ്റ് ആയിട്ട് നിങ്ങളുടെ സാമ്പത്തിക നിലയ്ക്ക് അനുസരിച്ചു രജിസ്‌ട്രേഷൻ ചെയ്യാം. GST രജിസ്‌ട്രേഷൻ മറക്കാതെ ചെയ്യുക. ഓരോ ഉത്പന്നങ്ങൾക്കും നിശ്ചിത നികുതി GST പ്രകാരം ഈടാക്കുന്നതാണ്. കയറ്റുമതി നടത്തുമ്പോൾ GST നമ്പർ ഉണ്ടാവുന്നത് ഉപകാരപ്പെടും. ഇരുപതിൽ കൂടുതൽ തൊഴിലാളികളുള്ള സ്ഥാപനമാണെങ്കിൽ EPFഉം പത്തിൽ കൂടുതൽ തൊഴിലാളികളുള്ള ഫാക്ടറി ആണെങ്കിൽ ESI രജിസ്‌ട്രേഷൻ ചെയ്യുക. സംഘടിത മേഖലയിലെ തൊഴിലാളികൾക്ക് വേണ്ടി പാർലമെൻറ് നടപ്പിലാക്കിയ പദ്ധതിയാണ് എംപ്ലോയീസ് സ്റ്റേറ്റ് ഇൻഷുറൻസ് (ESI) ആക്റ്റ്. തൊഴിലാളികൾക്ക് ചികിത്സാ സഹായവും സാമ്പത്തിക സഹായവും ആനുകൂല്യങ്ങളും പൂർണ സംരക്ഷണവും ഈ നിയമം വഴി സർക്കാർ ഉറപ്പിക്കുന്നു. മലിനീകരണ നിയന്ത്രണ സെർട്ടിഫിക്കറ്റും എടുക്കേണ്ടതാണ്. ## സജ്ജീകരണങ്ങൾ ഒരുക്കാം  വെയിലും മഴയും കൊള്ളാതെ ഉപകരണങ്ങളും മറ്റു വസ്തുക്കളും സൂക്ഷിക്കുന്നതിനായി അടച്ചുറപ്പുള്ള ഒരു ഇടം തിരഞ്ഞെടുക്കുന്നത് പ്രധാനമാണ്. 200 മുതൽ 300 ചതുരശ്ര അടിയുള്ള ഒരു ചെറിയ മുറിയിൽ വരെ ഈ സംരംഭം ആരംഭിക്കാം എന്നുള്ളതാണ് ഒരു പ്രത്യേകത. അതിനാൽ നിങ്ങളുടെ വീട്ടിൽ തന്നെ ഈ പദ്ധതി ആരംഭിക്കാൻ സാധിക്കും. വൈദ്യുതി- ജല വിതരണം ലഭിക്കുന്ന സ്ഥലമാകാൻ ശ്രദ്ധിക്കുക. ഫർണിച്ചർ, അസംസ്കൃത വസ്തുക്കൾക്ക് പുറമെ പാക്കിങ് സാമഗ്രികളും കരുതേണ്ടതാണ്. ## അസംസ്കൃത വസ്തുക്കൾ എങ്ങനെ ലഭിക്കും  മറ്റു സംരംഭങ്ങൾ പോലെ നിർമ്മാണത്തിനുള്ള അസംസ്കൃത വസ്തുക്കളും യന്ത്രങ്ങളും സംഘടിപ്പിക്കുക എന്നുള്ളതാണ് ആദ്യത്തെ ഘട്ടം. അസംസ്കൃത വസ്തുക്കൾ വളരെ എളുപ്പത്തിൽ ഇന്ത്യൻ വിപണികളിൽ ലഭിക്കും. തെക്കൻ ഇന്ത്യയിൽ പ്രത്യേകിച്ചും കർണാടക, ബാംഗ്ലൂർ, തമിഴ്നാട് ഭാഗങ്ങളിൽ നിന്നുമാണ് നിർമ്മാണത്തിന് ആയിട്ടുള്ള വസ്തുക്കൾ ലഭിക്കുന്നത്. ഉത്പാദന കേന്ദ്രങ്ങളിൽ നിന്നോ, മൊത്ത വിപണിയിൽ നിന്നോ വിതരണക്കാരിൽ നിന്നോ അസംസ്കൃത വസ്തുക്കൾ ശേഖരിക്കാവുന്നതാണ്. വസ്തുക്കളുടെ അളവ് ഉത്പാദനത്തിന്റെ അളവിനെ ആശ്രയിച്ചു നില്ക്കുന്നു. പ്രീമിക്സ് പൗഡർ, ബാംബു സ്റ്റിക്, പെർഫ്യൂം തുടങ്ങിയവയാണ് അഗർബത്തി നിർമ്മാണത്തിനായി ഉപയോഗിക്കുന്ന അസംസ്കൃത വസ്തുക്കൾ. ചാർക്കോൾ പൗഡർ, വുഡ് പൗഡർ, ജോസ് പൗഡർ എന്നിവയാണ് പ്രീമിക്സ് പൗഡറിന്റെ ചേരുവകൾ. പ്രീമിക്സ് പൗഡറുകൾക്ക് വിപണിയിൽ കിലോയ്ക്ക് 32 മുതൽ 40 രൂപ വരെയാണ് വരുന്നത്. ബാംബൂ സ്റ്റിക്കുകൾക്ക് കിലോയ്ക്ക് 50 രൂപ മുതലാണ് തുടക്കം. ഒരു കിലോയിൽ 3600 ഓളം സ്റ്റിക്കുകൾ ഉണ്ടാകും. പെർഫ്യൂമുകൾ പൊതുവെ വിലപിടിപ്പുള്ളവയാണ്. 800 രൂപ മുതൽ 3000 രൂപ വരെയാണ് വിലയായി കണക്കാക്കുന്നത്. ആവശ്യാനുസരണം ഒരു പ്രത്യേക അനുപാതത്തിലാണ് ഈ സുഗന്ധ ലായനികൾ ഉപയോഗിക്കുന്നത്. ## നിർമ്മാണ യന്ത്രങ്ങൾ വാങ്ങുമ്പോൾ ശ്രദ്ധിക്കേണ്ട കാര്യങ്ങൾ ചന്ദനത്തിരി നിർമ്മാണത്തിനായുള്ള യന്ത്രങ്ങൾ പൊതുവെ വലിയതാണ്. അതിനാൽ തന്നെ അവയ്ക്ക് ഒരുപാട് സ്ഥലം ആവശ്യവുമായി വരുന്നു. പ്രത്യേകം കേന്ദ്രികരിച്ച ഒരു മുറിയോ അല്ലെങ്കിൽ ഫാക്ടറി പോലെ വലിയ ഒരു സ്ഥലമോ ഇതിനായി സജ്ജീകരിക്കണം. ഉപകരണങ്ങളും യന്ത്രങ്ങളും ആൾപാർപ്പുള്ള സ്ഥലങ്ങളിൽ നിന്നു മാറി സജ്ജീകരിക്കാൻ ശ്രദ്ധിക്കുക. യന്ത്രങ്ങൾ വാങ്ങുമ്പോൾ പരിപാലനം കുറച്ചു ആവശ്യം വരുന്ന കുറഞ്ഞ ചിലവിൽ കൂടുതൽ ലാഭം തരുന്നവ തിരഞ്ഞെടുക്കാൻ ശ്രദ്ധിക്കണം. ഉത്പാദനശേഷി കൂടുതലുള്ള ഓട്ടോമാറ്റിക് യന്ത്രങ്ങൾക്കാണ് വിപണിയിൽ ഇന്ന് ഏറെ ആവശ്യക്കാർ ഉള്ളത്. ## നിർമ്മാണ രീതി  അഗർബത്തി പ്രീമിക്സ് പൗഡർ, വെള്ളം എന്നിവ 3:2 എന്ന അനുപാതത്തിൽ അർദ്ധ ഖരാവസ്ഥയിൽ കുഴച്ചെടുക്കുക. സ്റ്റിക്കുകൾ മെഷിനിൽ തന്നെ ആദ്യമേ നിറച്ചു വെക്കണം. കുഴച്ചു വെച്ച മിശ്രിതമാണ് മെഷീനിൽ ഇടുന്നത്. യന്ത്രം പ്രവർത്തിക്കുന്നതോടെ സ്റ്റിക്കുകൾ അടിച്ചു വരും. ഈ ചന്ദനത്തിരികൾ വെയിലത്തോ ഫാനിന്റെ കാറ്റിലോ ഡ്രയർ ഉപയോഗിച്ചൊ ഉണക്കിയെടുക്കുക. സുഗന്ധമുള്ള ചന്ദനത്തിരികൾക്കായി ഇവ പെർഫ്യൂം ലായനിയിൽ മുക്കി പാക്കറ്റിൽ ആക്കുകയാണ് ചെയ്യുന്നത്. കേരളത്തിലെ സംരംഭകർ പൊതുവെ ചന്ദനത്തിരികളിൽ പെർഫ്യൂം ഉപയോഗിക്കാറില്ല. സുഗന്ധമുള്ള ചന്ദനത്തിരികൾക്കായി അവർ പ്രത്യേകം ഏജൻസികളിലേക്ക് ഉണ്ടാക്കി വെച്ച അഗർബത്തികൾ എത്തിക്കുകയാണ് ചെയ്യാറ്. ## പരസ്യവും വിപണിയും സാങ്കേതിക വിദ്യകളുടെ കാലത്തു പരസ്യ പ്രചാരണം ഒഴിച്ചുകൂടാനാവാത്ത ഒരു ഘടകം തന്നെയാണ്. സമൂഹ മാധ്യമങ്ങൾ തന്നെയാണ് നിങ്ങളുടെ ചന്ദനത്തിരി ബ്രാൻഡിന്റെ വിജ്ഞാപനം ആളുകളിലേക്ക്‌ എത്തിക്കാനുള്ള ഒരു മികച്ച വഴി. പണ്ട് തൊട്ടേ നമ്മൾ ശീലിച്ചു വന്ന ടിവി, പത്രം തുടങ്ങിയ മാധ്യമങ്ങളും പരസ്യങ്ങൾ പ്രദർശിപ്പിക്കുന്നതിനായി ഉപയോഗപ്പെടുത്താം. ഇങ്ങനെയുള്ള പരസ്യങ്ങൾ നിരന്തരം കണ്ണിൽ പെടുമ്പോൾ സ്വാഭാവികമായും ഉത്പന്നങ്ങൾ വാങ്ങുന്ന സമയത്തു പരസ്യങ്ങളുടെ സ്വാധീനം ഉണ്ടാകും. ഈ പരസ്യങ്ങൾ കാണുന്ന വ്യക്തി സ്വാഭാവികമായും പരിചിതമായ ബ്രാൻഡ് തന്നെ തിരഞ്ഞെടുക്കാനുള്ള ഒരു പ്രേരണ കാണിക്കും. ## അഗർബത്തി വിപണിയിൽ എങ്ങനെ വിറ്റഴിക്കാം  ആഗോളവത്കരണത്തിന്റെ ഭാഗമായി വിപണിയിലെ സാധ്യതകളും വൻ തോതിൽ ഉയർന്നിട്ടുണ്ട്. ചന്ദനത്തിരി പോലെയുള്ള ചെറിയ കുടിൽ വ്യവസായങ്ങൾക്ക് ഇത് ഏറെ ഗുണം ചെയ്യും. ഏറ്റവും കൂടുതൽ ചന്ദനത്തിരികൾ വിറ്റു പോകുന്നത് പശ്ചിമേന്ത്യയിലും (35%) ദക്ഷിണേന്ത്യയിലുമാണ് (30%). ചിലവുകൾ കഴിച്ച് 25 മുതൽ 30 ശതമാനം വരെ ലാഭം നേടാൻ കഴിയുന്ന ഒരു സംരംഭമാണിത്. ### ഈ സംരംഭം മൂന്നു രീതികളിൽ ചെയ്യാം: - അസംസ്കൃത വസ്തുക്കൾ വാങ്ങി പൂർണ്ണമായും ചന്ദനത്തിരി നിർമ്മിച്ച് വിപണനം നടത്തുക. സുഗന്ധമുള്ളവയൊ ഇല്ലാത്തതോ ആയ ചന്ദനത്തിരികൾ നിർമ്മിക്കാവുന്നതാണ്. സുഗന്ധമുള്ള സ്റ്റിക്കുകളുടെ വില്പന രണ്ട് രീതിയിൽ സാധ്യമാണ്. 6 മുതൽ 8 സ്റ്റിക്കുകൾ വരുന്ന പൂജയ്ക്കെല്ലാം ആവശ്യമായ ചെറിയ പാക്കറ്റുകളാക്കി വില്പന നടത്താം. അല്ലെങ്കിൽ ഒരു കിലോ വരെ വരുന്ന വലിയ പാക്കുകളായും വിപണനം നടത്താം. - നിർമ്മിച്ച സ്റ്റിക്കുകൾ വാങ്ങി പെർഫ്യൂം മുക്കി പായ്ക്കു ചെയ്ത് വിൽക്കുക. - പെർഫ്യൂം മുക്കിയ ചന്ദനത്തിരികൾ മൊത്തമായി വാങ്ങി വീണ്ടും പാക്ക് ചെയ്ത് വിൽക്കുക. ചെറിയ ചന്തകൾ തുടങ്ങി മാളുകളിൽ വരെ പല ബ്രാൻഡിലുള്ള ചന്ദനത്തിരികൾ സുലഭമായി ലഭിക്കുന്ന കാലമാണ് ഇത്. ഈ സംരംഭത്തിൽ മുൻ നിരയിൽ നിൽക്കുന്ന ബ്രാൻഡുകൾ ഇല്ലാത്തതു കാരണം ശക്തമായ വെല്ലുവിളികൾ ഒന്നും തന്നെ ഉണ്ടാകില്ല എന്ന് വേണം വിചാരിക്കാൻ. ദീർഘ കാലം കേടുവരാതെ സൂക്ഷിക്കാൻ പറ്റുന്നത് മറ്റൊരു ഗുണമായി കരുതാം. വിപണിയിൽ ആവശ്യാനുസരണം സമയഭേദമില്ലാതെ അവ വിറ്റഴിക്കപ്പെടും. വിതരണക്കാർ മുഖേനയോ നേരിട്ടുള്ള വില്പനയോ നിങ്ങൾക്ക് തിരഞ്ഞെടുക്കാം. പലചരക്ക്– സ്റ്റേഷനറി കടകൾ, ചില്ലറ വില്പനകൾ, സൂപ്പർ മാർക്കറ്റുകൾ, പൂജാ സ്റ്റോറുകൾ എന്നിവയാണു പ്രധാന വിൽപനകേന്ദ്രങ്ങൾ. ക്ഷേത്രങ്ങൾ, മറ്റു ആരാധനാലയങ്ങൾ, അവയുടെ പരിസര പ്രദേശങ്ങൾ എന്നിവയിലെല്ലാം വില്പനസാധ്യതകൾ ഉണ്ട്. വിതരണക്കാരുടെ കമ്മീഷൻ വർദ്ധിപ്പിച്ചും വിപണി പിടിക്കാനാകും. വലിയ ക്ഷേത്രങ്ങളിൽ കരാർ മുഖേന നേരിട്ട് ഓർഡറുകളെടുത്തും വില്പന നടത്താവുന്നതാണ്. ഇന്ത്യ മാർട്ട്, ഫ്ലിപ്കാർട്, ആമസോൺ തുടങ്ങിയ സാധ്യതകളും വിൽപനക്കായി ഉപയോഗപ്പെടുത്താവുന്നതാണ്. ഗുണനിലവാരമുള്ള സുഗന്ധമുള്ള ദീർഘ കാലാവധി ഉള്ള ചന്ദനത്തിരികൾക്കാണ് ആവശ്യക്കാർ കൂടുതലും. വ്യത്യസ്ത വലുപ്പത്തിലുള്ള സ്റ്റിക്കുകൾ, വ്യത്യസ്ത സുഗന്ധങ്ങൾ എല്ലാം ആളുകളെ ആകർഷിക്കും. ഓരോ സ്ഥലങ്ങളിലും ഉപഭോക്താവിന്റെ അവശ്യകതകൾ വ്യത്യസ്തമായിരിക്കും. അതിന് അനുസൃതമായ വിപണി തന്ത്രങ്ങൾ കൈവരിക്കുന്നതിലാണ് നമ്മുടെ വിജയം നിലകൊള്ളുന്നത്. ഗുണനിലവാരമുള്ള ചന്ദനത്തിരികൾ നിർമ്മിക്കാൻ പ്രത്യേകം ശ്രദ്ധ പുലർത്തണം. കഠിനാധ്വാനവും സമർപ്പണവുമാണ് ഏത് സംരംഭവും വിജയിക്കാനുള്ള അടിസ്ഥാനം.